«Азат» ЖСДП‑ның тең төрағасы Жармахан Тұяқбайдың пiкi­рiнше, кедендiк одаққа қатысты шешiмнiң халықпен келiсiлмей, оңаша жағдайда қабылдануы — билiктiң ең басты қателiгi. «Басқасын былай қойғанда, кедендiк одақ пен бiрiккен экономикалық кеңiстiк ел егемен­дiгiне нұқсан келтiре ме, келтiрмей ме, билiктiң бұны ойлап, бас қатырғысы жоқ. Ал экономикалық, әлеу­меттiк жағынан алғанда, бұл одақ қаншалықты тиiмдi? Өндiрiс проблемасын шешпегендiк­тен, елiмiзде тауар өндiру дамымаған. Халық тұтынатын негiзгi тауарлардың кем дегенде 70-80 пайызы шетелден әкелiнедi. Көпшiлiгi — қытайдың арзанқол тауарлары. Сол тауарларға тосқауыл қойылса, құны жоғары ресейлiк өнiмдер бағаны шарықтататыны анық». «Азаттықтардың» айтуынша, мұндай одақтың құны халық үшiн тым қымбатқа түспек. Олардың дерегiне сенсек, кедендiк одақтың кесiрiнен нарықтағы тауар бағасы 40-50 пайызға қымбаттайтын көрiнедi. Сондай‑ақ ол кедендiк одақтың арқасында отандық өндiрiс жолға қойылады дегенге күмән келтiрдi. «Бiздiң ойымызша, өз өндiрiсiмiз болмағандықтан, Ресей мен Белоруссияның тауар өндiрушiлерi нарықты жаулап алады. Сөйтiп, беларусь пен ресейлiк тауар өндiрушiлерге тиiстi жағдай жасап беремiз. Осының салдарынан өз өндiрiсiмiздiң ахуалы мұнан бетер нашарлай түсе ме деген қауiп бар», — дейдi ол.

«Азат» ЖСДП‑ның тең төрағасы Болат Әбiлев билiктiң геосаяси ойындары елдiң экономи­ка­лық‑әлеуметтiк мүддесiне ғана емес, ұлттық қауiпсiздiкке де қатер төндiретiнiне баса назар аударды. «Кедендiк одақ шикiзат саласындағы алпауыттарға ғана тиiмдi. Түптеп келгенде, одаққа осы алпауыттардың мүддесi үшiн ғана кiргенi­мiз анық. Ал халық орта және шағын кәсiпкерлерге бұдан келiп‑кетер пайда шамалы. Әсi­ресе, одақтан қарапайым халық оңбай ұтылады», – дейдi ол. Сондықтан «азаттықтар» халықты кедендiк одақтың терiс салдарынан қорғайтын және орта және шағын бизнестiң дамуына жол ашатын нақ­тылы шараларды iске асыру қажет деп есептейдi. Және олар билiктiң бұл шұғыл шараларды кейiнге қалдырмай, тез қабылдауын талап еттi. Атап айтқанда, «азаттықтар» мынандай нақты ұсыныстарды көтердi: елдегi жалақы мен зейнетақыны кедендiк одақтан туындайтын себептерге және коммуналдық тарифтерге сәйкес индексациялау; шағын және орта бизнестi 5 жылға дейiн салықтан босату; шағын және орта бизнестi үстемесi 6 пайыздан аспайтын несиемен қамтамасыз ету; лицензияланатын тауарлар мен қызметтер тiзiмiн, сондай‑ақ халықтың қауiпсiздiгi мен денсаулығына қауiп төндiруi мүмкiн жағдайдан өзге шағын және орта бизнестi тексеруге қойылатын талаптар мен оларды тексеретiн мекемелер санын мейлiнше қысқарту; шағын және орта бизнестi коммуналдық және электр желiлерiне тегiн қосу. Бұл шараларды жүзеге асыру үшiн қаржы көзi қажет екенi өзiнен‑өзi түсiнiктi. Бiрақ «азаттықтар» мұның барлығын елеп‑екшеп, кесiп‑пiшiп қойыпты. Партияның тең төрағасы Болат Әбiлевтiң айтуынша, мұнай өндiрушi мен тау‑кен iстерi компанияларымен жасалған келiсiмшарт­тар­ды қайта қарап, оларға жасалатын алуан түрлi жеңiлдiктердi алып тастау арқылы жоғарыдағы ұсы­ныс­тарды оп‑оңай iске асыруға болады. Осының өзi бюджетке ондаған миллиард доллар қаржы түсiмiн қамтамасыз етедi. «Ақыры кедендiк одаққа мүше болған екенбiз, онда мұнай мен металға салынатын баж салығын Ресейдегi баж салығымен теңестiрген жөн. Өйткенi елiмiз­де мұнайға баж салығы салынбайтындықтан, бюджет жыл сайын 20 миллиард долларға жуық қаржыдан айырылады», — дейдi ол. Сонымен қатар «азаттықтар» Ұлттық қордың қаржысын тиiмдi бағыттаудың жолын тауыпты. Олардың ойынша, шағын және орта бизнестi жеңiлдiкпен несиелеу үшiн Ұлттық қордан жыл сайын 3 миллиард доллар бөлу қажет.

Өз кезегiнде партияның саяси кеңесiнiң мүшесi Петр Своик елiмiздiң тұрғын үй-коммуналдық шаруашылық саласының халi мүш­кiл екенiн, сондықтан оны кешендi түрде реформалау қажеттi­гiн мәлiмдедi. Сол себептi «Азат» ЖСДП осы саладағы мәселелермен айналысатын арнайы қоғамдық кеңес құруды ұйғарыпты. 

«Азат» ЖСДП жетекшiлерi 27 наурыз күнi Алматы мен елiмiздiң басқа да қалаларында жалпыхалықтық митингiлер мен пикеттер ұйымдастырып, халықты осы талаптарды қолдауға шақыратынын мәлiмдедi.