Қаржы қадағалау агенттiгi «БТА Банкi» ұсынған қайта құрылымдау жоспарын мақұлдады. Агенттiк төрайымы Елена Бахмутованың айтуына қарағанда, Ұлттық банк төрағасы, Қаржы министрi мен Қаржы қадағалау агенттiгi қайта құрылымдау жоспарын 26 қыркүйекте‑ақ мақұлдап қойыпты. «БТА Банкi» басшылығы мен кредиторлардың қайта құрылымдау турасындағы пiкiрi екiге жарылғанына қарамастан. Бiр қы­зығы, банк қол жеткiзген өзара түсiнiстiк жөнiндегi меморандумда да кредиторлардың банктiң қайта құрылымдау жоспарымен келiспейтiнi, сол себептi қайта құрылымдаудың мүлде бөлек нұсқасын ұсынғаны анық көрсетiлген. Айталық, БТА‑ның қайта құрылымдау жоспарында қарызды 8,2 миллиард долларға қысқарту көзделсе, кредиторлар қарызды 4,9 миллиард долларға қысқартуды жеткiлiктi деп есептейдi. Сөйтiп, кредиторлардың кеңесшiсi «Делойт» пен банк жалдаған консалтингтiк компания несиелiк портфельдi бiрiгiп қайта қарастыруға келiскен.

Қаржы қадағалау агенттiгiнiң банк ұсынған қайта құрылымдау жоспарын мақұлдайтынына ешкiм де күмән келтiрмедi. Бұған дейiн де БТА‑ның триллионнан асқан терiс капиталы, пруденциалды нормативтi орындамауы тәрiздi жайттарға көзжұмбайлықпен қарап келген Қаржы қадағалау агенттiгi қайта құрылымдау жоспарын керi қайтармайтыны о баста‑ақ белгiлi болған. Ђйткенi, жоспар мақұлданбаған жағдайда банк лицензиясын айырылып, банкроттыққа ұшырар едi. Ендi банк 7 желтоқсанға дейiн кредиторлармен бiржола келiсiмге келуi тиiс. Елена Бахмутова егер кредиторлар белгiленген мерзiмге дейiн келiсiмге қол қоймаса, Қаржы қадағалау агенттiгi банк лицензиясын тоқтатып, оны жабатынын тәптiштеп түсiндiрдi. Қысқасы, БТА келiсiмге қол жеткiз­бесе, заңнамада көрсетiлген барлық механизмдер iске асырылады. Жабылған банктiң жақсы активтерi тұрақтандыру банкiне аударайық деген ұсыныс көптен берi айтылып жүр. Жақында заңнамаға бұл өзгерту енуi тиiс. Бахмутова мұнысымен кредиторларға «егер келiсiмге келмесеңдер, жағдай ушыға түседi», «жер сипап қалғыларың келмесе, тезiрек келiсiмге келiңдер» дегендi меңзегендей. Бұған дейiн «Самұрық‑Қазына» басшысы Қ.Келiмбетов те, банктiң топ‑менед­жерлерi де кредиторлар БТА ұсынған опцияларға келiспесе, ақшадан мүлде қағылатынын бiрнеше рет ескерткен. Ендi Қаржы қадағалау агенттiгi де кредиторларды тығырыққа тiреп отыр. Оның үстiне елiмiздiң заңнамасы бойынша барлық кредиторлардың келiсiмге келуi мiндеттi емес, үштен бiр бөлiгi банк ұсынған опцияларды таңдаса жеткiлiктi. Кредиторлармен түбегейлi келiсiмге қол жеткiзген соң банк барлық пруденциалды нор­мативтi орындауға мiндеттеледi. Қазiр кредиторларға келiсiмге келуден басқа жол қалмағандай. Десек те олар 7 желтоқсанда келiсiмге қол қойған күннiң өзiнде арадағы келiссөздердiң аяқталуы екiталай. Кредиторлармен арадағы мәселелер келесi жылы да жалғасатын тәрiздi.