Бiздiң үкiмет көп қателеседi. Бiр ғана мысал – 2009 жылғы ЖIӨ-нiң көрсеткiшi 0,1 пайыз болуы керек деп меже белгiлеген едi. Үкiмет “байқамай” ол межеден де асып түсiптi. Ендi мiне, ресми статистикалық мәлiметтерге сенсек, президент күткендей, елiмiздiң ЖIӨ-сi 1,1 пайызға өсiптi. Және қараша мен желтоқсан айларындағы көрсеткiштер экономикамыздың рецессиядан бiртiндеп шыға бастағанын байқатады-мыс. 2009 жылдың бiрiншi және екiншi тоқсанында көрсет­кiштерiмiз “минуста” болды, үшiншi тоқсанда нөлдi көрсеттi. Ал желтоқсан айындағы экономикалық өсiм қарқыны тiптi де “таңғаларлық”. Айталық, “Ракурс” экономикалық талдау орталығы осы статистикалық деректерге сүйене отырып мынадай баға берген: “Алдыңғы тоқсанға қарағанда төртiншi тоқсанда 5 пайыздық өсiм бар. Былтырғы жылдың осы тоқсанымен салыстырғанда ЖIӨ-нiң өсiмi 7 па­йызға артқан. Желтоқсан айындағы жетiстiк жалпы 2009 жылғы көр­сеткiштерiмiздi алдыңғы жылғы көрсеткiштерiмiзге қарағанда 0,5 па­йызға көбейткен”.

Экономиканың негiзгi салалары 2009 жылдың төртiншi тоқсанында: өнеркәсiп – 9,6, ауылшаруашылығы – 51,9, құрылыс – 7,1, көлiк – -1,3, байланыс – 14, сауда – 8,8 пайызға өсiм қарқынын көрсетiптi. Тоқырап тұрғаны – тек қана қаржы саласы ғана екен. Бұл сала басындағы қиындықтан арыла қоймаған.

“Ракурс” былай деп мәлiм­дейдi: “Бiз төртiншi тоқсанда аталған салаларда жағымды өзгерiс­тер барын байқадық. Соңғы алты тоқсан iшiнде бiрiншi рет құрылыс саласы болымды өсiм көрсеттi. Өнеркәсiп өсiмiне, бұрынғысынша, шикiзат өндiру саласының есебiнен қол жеткiзiлдi. Бiрақ, өңдеушi өнеркәсiп, соңғы екi айдағы мәлiмет бойынша, болымсыз қарқыннан болымды қарқынға жеттi. Бұл – осы саланың рецессиядан шыға бастағанының нышаны”.

Лайым солай болғай! Бес тоқсан бойы рецессиядан көз ашпаған экономикамыз аяқтан тұрып жатса, кәнеки! Әйтсе де, сарапшы мамандар бұл қуанышымызға ортақтаспай отыр. “Шынайы жағдайды емес, билiктiң қалауы мен пәрменi бойынша қолдан құрастырылған, бұрмаланған деректер емес пе?” деген алғашқы күдiгi­мiз­­дi мақұлдай түседi. Экономистер бұл көрсеткiштер саяси тапсырыс бо­йынша жасалуы мүмкiн дейдi. 

“Бүгiнгi күнi экономикалық өсiмнiң артуына ешқандай негiз жоқ. Өсiм бол­ған күннiң өзiнде, бұл – мемлекеттiң сырт­тан қарыз алуының есебiнен. Сырттан алынған қарыздарда бюджетке кiрген кiрiс болып есептелiнген болар. Тауарлар номенклатурасы мен халықтың экономикалық белсен­дiлiгi бойынша есептесе, ЖIӨ көрсеткiшi - 5 пайызға құлдырауы ықтимал”, – дептi “Республика” басылымына берген сұхбатында Қазақстан даму институтының прези­дентi Мағбат Спанов.

Қалай десек те, бұрынғы басшысы бас сауғалап, құқық қорғау органдарынан қашып жүрген статистика агенттiгiнiң мәлiметтерiне сену де қиын. Әйтеуiр, үкiмет соңғы тоқсанда айды аспанға бiр-ақ шығарды –1 па­йыз болса да, өсiмге қол жеткiздi. Бiрақ қандай жолмен? “Қазаншының өз еркi, қайдан құлақ шығарса” дегеннiң керi болмаса игi.