19 қараша 2009
Қиын сәтте қол ұшын бермесе, ондай президент пен билiктiң керегi қанша?
Алматыда «Халыққа баспана қалдырайық» қозғалысының мүшелерi баспасөз мәслихатын ұйымдастырды. Олар: «Президент Н.Назарбаев билiктен кетсiн», – деп мәлiмдеме жасады.
Естерiңiзге сала кетейiк, президент тiкелей эфирде «үлескерлер мәселесiн шешудiң қазақстандық тәжiрибесi – еш жерде кездеспейтiн жағдай» деп сөзiн былай жалғаған-ды: «Халық бөлiнген ақша үшiн мемлекетке алғыс айтсын. Борышкерлер банктерден алған несиелерiн қайтаруы шарт. Оны құқық қорғау органдары бақылап отыратын болады. Заң бар. Несие алу үшiн кепiлдеме қойылған. Сондықтан несие не кепiлзат қайтарылуы керек. Егер несие банкке қайтарылмаса, банктер жұртты қалай несиелендiредi?».
Әйтсе де, «Халыққа баспана қалдырайық» қозғалысының белсендiлерi бұл пiкiрмен мүлде келiспейтiнiн жеткiздi.
– Шынын айтсақ, соңғы сәтке дейiн үмiтiмiздi үкiлеп отырдық. Мемлекет басшысы бұл мәселеге саяси баға берiп, дұрыс шешiм шығарады, елдiң тынысы кеңейедi деп сенiп ек, – деп сөз бастады баспасөз мәслихатында «Халыққа баспана қалдырайық» қозғалысының төрағасы Есенбек Өктешбаев. – Бiрақ, сенiмiмiз ақталмады. Бiле-бiлсек, банктердiң азаматтарды қарызға батырғаны – үлкен мәселе. Шешiлмеген мәселеге нүкте қойып, борышкерлердi шетке ысыруға болмайды. Тiптi президент болса да. Президенттi халық сайлады. Өзiне жүктелген қызметiн орындамайды екен, халық орнынан алып тастауға да құқылы. Қиын сәтте қол ұшын бермесе, ондай президент пен билiктiң керегi қанша? Бұл – бiздiң талап. Бiр ғана бiздiң қозғалыстың алты мың мүшесi бар. Оған басқа да қоғамдық қозғалыстарды қосыңыз. Тiркеуде тұрмағандар қаншама. Есебiмiз бойынша дәл осы мәселеге тап болғандардың саны жүз мыңнан кем емес, – дедi.
Борышкерлердiң айтуынша, олар несиелерiн қайтарудан жалтарып тұрған жоқ. Тек уақыт керек. Сұрайтыны – қарызды қайтаруды кейiнге қалдыру. Дағдарыс. Жұмыс жоқ. Сондықтан да мүмкiндiк болмай тұрған кез. Ал үкiмет тек қана банктердi сақтап қалу жолын қарастыруда. «Оларға ешкiм несие ал деген жоқ» деп кiнәнiң бәрiн бiзге артады. Алайда, мұнда мемлекеттiң де қателiгi бар», – дейдi борышкерлер.
Баспасөз мәслихатына қатысушылар жағдай осылай жалғаса берсе, «Қазақстан – 2012» қоғамдық қозғалысымен бiрге 16 желтоқсанда және бiр наразылық акциясын ұйымдастыратынын ескерттi. Сондай-ақ, «Халыққа баспана қалдырайық» қозғалысының мүшелерi Алматы қалалық iшкi iстер департаментiнiң қызметкерлерi арқылы ҚР IIМ-ге үндеу жолдамақ. Онда баспанасынан айырылуға шақ тұрған қарапайым азаматтарға полицияны жұмсап, күш көрсету заңсыз екенi баса айтылған.
Дилара ИСА
Уәж айту