Ескi алаңға жиналған наразы топ полицияның оларды жиi тоқтатып, айыппұл салатынына қарсы. Жүргiзушi­лердiң айтуынша, қаладағы көлiктiң көптiгiнен аялдамаларда кептелiс болып, олар ереженi бұзуға мәжбүр. Наразылық шарасына келген кондукторлардың бiрi Бауыржан Сапаров мәселенiң мән-жайын былай түсiндiрдi: «Бiз қалай заң бұзбаймыз? Аялдамаларда үнемi кептелiс. Жеңiл машиналар жолды жауып тұрады. Амалсыз олардың алдына барып тоқтаймыз. Егер олардың орнынан қозғалуын күтiп тұрсақ уақыт өтiп кетедi. Ал бiзге күндiк жоспар – жиыр­ма жетi мың теңге. Оны орындамасақ жалақымыздан қағыламыз. Бiздiң қолымызға қарап отырған бала-шағамыз бар. Сондықтан, талабымыз не автопарк жетекшiлерiмен келiсiп күндiк жоспар төмендетiлсiн немесе МАИ қызметкерлерiнiң айыппұлдарына шектеу қойылсын» Оның бұл сөзiне автобус жүргiзушiлерiнiң бiрi Бекет Меңдебекұлы да қосылды: «Парктi үкiмет өз қарауына алсын. Жоспарды тұрақты қойып, маршруттар санын қысқартсын. Автобустар қалыпты жағдайға келтiрiлсiн. Мiне, мыналар 5 жыл болған автобустар, орнынан әрең қозғалады. Олардың бұл жағдайы үшiн, «экологияға зиян келтiрдi» деп тағы да бiзге айыппұл салынады», – дедi ол.  

Жүргiзушiлермен тiлдесуге Алматы қаласы Жолаушылар көлiгi және автомобиль жолдары басқармасы бас­тығының орынбасары Асқар Тойбаев та келдi. Мән-жайды тыңдаған ол, автопарк және жол полициясы басшыларымен бiрлесiп тиiстi шара қолданатынын жеткiздi. Бiрақ, басқарма тарапынан жүргiзушi­лер талабына кешегi күнге дейiн жауап жоқ.