Жұмысшылардың бұл жолғы наразылығына не түрткi болды? Мұнайшылардың айтуына қарағанда, ақпан айы­ның аяғында “Өзенмұнайгаз” басшылығының нұсқауымен жалақы тө­леу ережелерiн өзгертуге қатысты ескертпелер таратылып, оған зорлап қол қойдыру науқаны жүргiзiлдi. Сөйтiп, жаңа ереже бойынша мұнайшыларға осы кезге экологиялық жағдайға байланысты төленiп келген 70 пайыз аудандық коэффициент пен айлық сыйақының бiр бөлiгi алынып тасталып, негiзгi жалақыға қосылатын көрiнедi. Бұл мұнайшылардың ашу-ызасын тудырды. Бiрақ “Өзенмұнайгаз” басшылығы жұмысшылардың ескертпесiн құлақтарына да iлмедi. Мұнымен санасу түгiл, керiсiнше, еңбекақы өзгерiсiне қорқытып қол қойдыруды жалғастыра бердi. Басшылықтың бұл бассыздығы мұнайшылардың жаңа толқуларына әкеп соқтырды. Сөйтiп, мұнайшылар наурыздың алғашқы күндерiнде жұмысын небәрi 1-3 сағат­қа ғана тоқтатып отырса, 4 наурыз күнi “Өзенмұнайгаз” өндiрiстiк филиалы 15 мекемесiнiң жұмысшылары жұмысын толық тоқтатып, ереуiлге шықты. Ереуiл 5 наурызда да жалғасын тапты. Бұл күнi ереуiлге 5-6 мың мұнайшы қатыс­ты. Сондағы ереуiлшiлердiң қойған талабы мынандай: “1. Еңбек­ақы жүйесiн өзгертпеу, яғни жалақыға қосымша берiлетiн 70 пайыз коэф­фициенттi негiзгi тарифке қоспау. Мұ­найшы­лардың есебiнше, 70 пайыз коэффициент айлыққа кiргiзiлген жағдайда қол­ға тиетiн жалақы едәуiр аза­йып кетедi. 2. Қазiргi “ӨМГ” ӨФ басшыларын қарапайым жұмысшылардың мүдде­сiне керi iс-әрекет жасаумен айналысқаны үшiн жұмыстарынан босату”.

Мұнайшылар мен басшылық арасындағы текетiрес осымен үш жылдан берi жалғасып келедi. Мұнайшылардың жағдайы әсiресе, “Өзенмұнайгаз” “Қаз­мұнайгаз Барлау Өндiру” АҚ құ­рамына қосылған соң тiптен ушыға түстi. Жаңаөзендiк мұнайшылар ереуi­лiнiң себебi тек еңбекақы төлеу тәртi­бiне тiрелiп отырмағаны түсiнiктi. Оған жалақының дұрыс төленбеуi, еңбек жағдайларының болмауы, “ҚМГ” БӨ АҚ қызметкерлерiнiң өздерiмен салыс­тырғанда бiрнеше есе көп жалақы алуы, қосалқы бөлшектер­дiң жоқтығы, түрлi әлеуметтiк әдiлет­сiздiктер түрткi бол­ған. Қысқасы, мұнайшылар барлық мәсе­ленi тек үкiмет қана шеше алады деп есептейдi. Ол үшiн, мұнайшылардың ойынша, үкiмет мына шараларды iске асыруы тиiс: 1. “ҚазМұнайГаз” БӨ” АҚ тез арада Жаңаөзен қаласына, ең құрығанда Ақтау қаласына көшiрiлсiн. Немесе “Өзенмұнайгаз” оның құрамынан шығарылып, дербес акцио­нерлiк қоғам болып қайта құрылсын. Мұнайшылардың арқасында әлдекiм­дер шалқып-шылқып өмiр сүрмеуi тиiс. Жақсы пәтер, қомақты жалақымен “ҚазМұнайГаздықтар” емес, қатардағы мұнайшылар қамтылуы қажет. 2. “ҚМГ” БӨ” АҚ қызметкерлерiнiң са­ны қысқартылсын. Олардың ұзын саны 100 адамнан аспауы тиiс. Және жалақыларының мөлшерi “Өзенмұнайгаз” мұнайшыла­ры­нi­кiмен бiрдей болуы керек. 3. “ҚазМұнайГаздағы” негiзгi би­лiк мұнай өндiретiн филиал басшыларына берiлсiн. 4. “Өзенмұнайгаз”, “Ем­бiмұ­най­газ” тендерлерi өздерiнде өткi­зiлуi тиiс. 5. Жаңаөзенде жаңадан өндi­рiстiк жұмыс орындарын ашып, жұ­мыссыздықты азайту керек. 6. “Өзенмұнайгазға” материалдар, қосалқы бөлшектер, құрал-жабдық, мұнай техникасын сатып алу үшiн бөлiнетiн қаржыны көбейту керек.

Қазiр Жаңаөзенде “үкiмет “Өзен­мұнайгазды” қытайлықтарға бермек” деген қауесет гулеп тұр. Бiрақ жергiлiктi әкiмшiлiк “Өзенмұнайгаз” Қытайға сатылмайды” деп мәлiмдеме жасады. Сондай-ақ әкiмшiлiк: “Мұнда ешқандай саяси мәселе жоқ. Ал жұмысшылардың бас көтеруi – заңсыз”, – деп кiмге ұрынарын бiлмей тұр.

Соңғы дерек: 9 наурыз күнi ереуiлге қатысқандар саны сегiз мыңнан асты деген ақпарат жеттi.