10 наурыз 2010
«Бомждар президентi» болғаныңыз ба?
Мен Маңғыстауда туып-өспесем де, бұдан 36 жыл бұрын осы қасиеттi өлкеге келiн болып түскен адаммын. Аманқос Ұзақбаев деген азаматтың «Жас Алаш» (31.12.2009), «Алтын ғасыр» (15.01.2010) газеттерiнде жарияланған «Зобалаң немесе тас жүрек ұлдарының тепкiсiнде зар илеген қарапайым қазақ» атты мақаласын оқып, құптай отырып, өзiмнiң де пiкiрiмдi қосқым келдi. Мақалада жазылғандар – айна қатесi жоқ шындық. Астанада пәленбай миллион теңгеге мұз қалашық салып, халықтың маңдай терiн далаға шашқанша, тұлдыр жетiмдерге үй салдырып бермей ме? Президенттiң қолын сүйiп, медаль алған Әбiш Кекiлбаев ағамыз 70 жасқа толғанда әкiм-қаралар тартып алғандай қылып жұрттан жылу жинағанын өз құлағыммен естiдiм. Аман болсаңыз, сiз де жетпiске келерсiз, құлағыңызға алтын сырға, Нұреке.
«Зейнетақыны 25 пайызға өсiрдiм» дедiңiз, ал мұның қызығын зейнеткерлер көрдi ме, алдағы уақытта көрер ме? Әрине, көрмейдi. Себебi халықтың күнделiктi тұтынатын тауарлары, электр жарығы, телефон, бәрi-бәрi үстi-үстiне қымбаттап жатыр.
Ал ендi, жастар мәселесi ше? «Зобалаңда» жазылғандай жұмыс жоқ, оқу жоқ. Көп нәрсе ақшаға барып тiреледi. Жұмысы жоқ адам қалай ақша табады? Бұрындары (кеңес өкiметi кезiнде) жастарды оқытып, белгiлi еңбек азаматтарына бекiтiп берiп, ол бiлгенiн үйретiп, сосын жұмысқа жiберушi едi. Ал қазiр ше? «Резюме» деген жалқау қағаз сұрайды, ол Мұқағали ақын айтпақшы, «архивтерде шаң басып жатады» да, тек дүмдiлердiң және тамыр-танысы барлардың балалары жұмысқа қабылданады, әрине мұның астарында пара жатқаны айтпаса да түсiнiктi.
Президент мырза, сiз президент болғалы елде жетiм мен жесiр көбейдi. Елдегi жесiрлерге қандай жақсылық, көмек көрсетiп жатырсыз? Жетiмдерге ше? Сiз тағайындап, қонжитып креслоға отырғызған әкiмдерiңiз азғантай жасағандарын дабыра қылып, жарнамалап, көпiртiп айтады да, ал жасалмай жатқан қыруар жұмыстарды (кемшiлiктердi) жауып-жасырмалап, оны айтқандарды жау көредi. Жиналыстарға тек бюджеттiктердi, «бармасам жұмыстан шығарып жiбередi» деп бас баққандарды ғана шақырады. Бiз барсақ жақтырмайды, себебi бiз турасын, шындығын айтамыз.
Құрметтi президент мырза! Сiз парламенттегiлерге: «Какого хрена вы сидите?! Халықтың мұң-мұқтажын шешпесеңдер», — деп теледидардан ұрысқан болдыңыз. Ал, ендi талқылап қарасақ, қарапайым халыққа мұныңыз тек «показуха» сияқты көрiндi. Себебi, әкiмдер, басшылар – барлығы сiздiң тағайындап қойған адамдарыңыз. Оларды ауық-ауық ауыстырып, «рокировака» жасай бересiз, одан өзгерiп жатқан ештеңе жоқ.
Жақында «сәуiр айынан бастап, айлық пен шәкiртақы өседi» деп халықты тағы қуантқан болдыңыз, шындығында мұныңызды бiз «жай алдарқату» деп түсiндiк. Себебi, ақыны өсiрудiң арты азық-түлiк, күнделiктi тұтыну тауарларының қымбаттауына әкелiп соғатындығына дау жоқ. Әрине, бұл жерде ештеңеге қысылмайтындар — 3000-4500 доллар жалақы (қосымша «шабашкiсi» тағы бар) алатын шенеунiктер.
Нұреке, әрқашанда таяқтың бiр басы өзiңiзге тиiп жатады, себебi Қазақстандағы «қара қазанның» иесi – өзiңiзсiз. Мысалы, Қарағұсова ханым бiлмей қалған 8 миллиард доллар қайда? Өзi Швейцарияның, баласы Украинаның ең бай адамдарының бiрiне айналған Храпунов күйеубаланың шетелге алып кеткен бiрнеше миллиард доллары қайда? «Валют Транзиттiң» бастығы, iстi болып, сотталған Беляев мырзаның зайыбымен сiз күнi кеше вальс биледiңiз. Құлағына сыбырлап, сұрамадыңыз ба: «Халықтан жеген 960 миллион доллар қайда?» деп. Мен сiзден басқа ешкiмдi сынай алмаймын, себебi, олардың (жебiрлердiң) бәрiне жағдай жасап отырған — сiзсiз.
Қаңтар айының ортасында теледидардан Астана жақтан бiр филармония домбырашысы өзiнiң үйдiң кезегiнде тұрғанын, бiрақ әлi үй кезегi жылжымай-ақ қойғанын айтқанда, жылжымайтын мүлiк қорының басшысы былай дедi: «Ондай-ондай бомждарға берiлетiн үй жоқ. Өздерi ақшаға сатып алсын!».
Өнер адамдары шенеунiктер сияқты пәленбай мың долларлап табыс таппайды ғой. Кезекте тұрған жаңағыдай мәдениет, мемлекет қызметкерлерiн бомж деп есептесек, қазiр Қазақстандағы 16 миллион халықтың 15 миллионы — қарапайым («бомж») адамдар. Амриннiң тiлiмен айтқанда, бомждар. Сонда сiз «бомждар президентi» болғаныңыз ба, Нұреке?
Алуаш ОҢҒАРОВА.
Мұнайлы ауданы,
Маңғыстау облысы.
Мерейлі, атыңа затың сай , мерейің үстем болсын! Өзіңде бәрі жақсы болғасын, өзгелердің жағдайын көрмей қалғансың ғой!!! Сен интернетте отырғаныңда, қызылағаштықтар қан жылап жатыр еді, ал "президентіміз" олардың қалін білуге "қолы тимей" жатқан болатын. Ондай ел басшысына елі сүйсінер ме?
Алуаш замандасым, ер азаматтардың айта алмағанын әйел заты болып өзің айтқан батылдығың мен ерлігіңе бас иемін!!! Деніңе саулық, отбасыңа амандық беріп, БІР АЛЛАМ өзіңе жар болсын!