1921 жылы 22 наурыздан шыға бастады
Бастапқы
АЙТЫЛҒАН СӨЗ
Қартаюға қарсы, яғни жасартатын, мәңгілік өмір сүруге мүмкіндік беретін – дәрі-дәрмектер ойлап табу керек. Міне, қазіргі ғалымдар әлемде осындай шаруалармен айналысып жатыр.
Қазақстан ғалымдармен кездесуінде айтқан ұсынысынан. 04.09.09
Автор: Н.Назарбаев, ҚР президенті
Информационный сервер xFRK: валютные баннеры для Вашего сайта
Жас Алаш №8 (16194) 31 қаңтар, сейсенбі 2017
31 қаңтар 2017
Тапсырыс берушiлер тасада қалды...

ОЛАР ЖҰМСАҒАН ЖҰМЫССЫЗДАРҒА СОТ ҮКIМ ШЫҒАРДЫ

“Не шықса да Шымкенттен шығады” деген сөз осындайда еске түседi. Қайбiр жылы Ұлттық бiрыңғай тестiлеуге қыздың орнына жiгiт кiрiп, елдi шулатып едi. Жуырда Шымкент қаласының әл-Фараби аудандық соты мемлекеттiк қызметкерлердiң немесе осы қызметке кiргiсi келгендердiң орнына емтихан тапсырып, шенеунiктерге заңсыз қызмет көрсеткен ұйымдасқан қылмыстық топқа үкiм оқыды. Жалған сынақ тапсырушылар былтыр қазан айында әшкереленген болатын. Мемлекеттiк қызмет iстерi және сыбайлас жемқорлыққа қарсы iс-қимыл Ұлттық бюросының қызметкерлерi оларды Алматы мен Талдықорған қалаларында ұстады. Тексеру барысында қылмыстық топтың ордасы Шымкент қаласында екендiгi анықталған.

Топ мүшелерiнiң алды сот алдындағы жазасын былтыр алған. Үкiм қалған 19 адамға оқылды. Сот олардың сегiзiн бас бостандығынан айыру жазасына кестi. Топтың екi жетекшiсi 7 жылды, қалған алтауы 5 жылды арқалады. Қалғандары жасаған қылмыстары жеңiл болғандықтан және жазаға тарту мерзiмiнiң өтiп кетуiне байланысты босатылды.
Бiр айта кетерi, жалған тест тапсырушылардың барлығы – өте сауатты кәсiби мамандар. Мемлекеттiк қызметкерлерге қойылған сұрақтардың барлығына мүдiрмей жауап берiп, тестi сәттi тапсырып шығу үшiн жоғары кәсiби бiлiмдiлiктiң қажеттiлiгi айтпаса да түсiнiктi. Барлығы жұмыссыз. Мынандай табысты кәсiбi бар азаматқа жалақысы жоғары жұмыстың керегi де болмаған сияқты. Өйткенi қылмыстық топ мүшелерi тестiге әр кiргенi үшiн 2-3 мың доллардан ақы алып отырған. Өздерiнiң қызметтерiн клиенттердiң талап-тiлегiне орай Қазақстанның кез келген қаласында жүргiзiп отырған. Судья Еркiн Оспановтың айтуынша, олар күдiк болмау үшiн тестiге кiретiн үмiткердiң жеке куәлiгiн арнайы аппараттың көмегiмен қайта жасап шыққан. Куәлiкте үмiткердiң аты-жөнi жазылғанымен, жалған тест тапсырушының фотосуретi жапсырылған. Жаза арқалағандардың арасында ерлi-зайыптылар да бар. Олардың артында қалған екi баланың тағдырын ендi қорғаншылық және қамқоршылық бөлiмi шешетiн болады.
Жалпы қылмыстық iс бойынша сотталушылардың 148 адамның орнына кiрiп, тест тапсырғаны мәлiм болған. Қайталап айтайық, бұл тергеу барысында анықталғаны ғана. Қазiргi уақытта осы 148 азаматтың бәрi жұмыстарынан босатылған көрiнедi. Олардың қандай лауазым иелерi екендiгi де белгiсiз. Бiрақ 2-3 мың долларды анау-мынау шенеунiктiң төлей алмасы бесенеден белгiлi ғой.
Алаяқтардың қызметiне тапсырыс бергендер осылайша тасада қалды. Жiптiң ұшын тарта берсеңiз, күдiктiлердiң қатары бұдан да көп болуы мүмкiн. «Емтиханға бiр азаматтың қайта-қайта кiре бергенiн тест тапсыру орталығының мамандары мүлдем бiлмеген бе?» деген сұрақ туады. Мемлекеттiк қызмет iстерi агенттiгiнiң мамандары жас балаша алдана салатын соншалықты аңқау ма едi деп те ойлайсың. Әлде антикоррупция ескi әрiптестерiнiң былық-шылығын әшкерелеуге құлық танытпады ма екен? Кiм бiледi?

Бақытжан ӘБДIРАШҰЛЫ,
Оңтүстiк Қазақстан облысы

« алдыңғы бетке  |  келесі бетке »
ПІКІРІН БІЛДІРГЕНДЕР (0)
Пікіріңізді бөліскіңіз келсе:*
Жазылатын пікірдің көлемі 500 символдан аспауы керек
Аты-жөніңіз:*
E-Mail (сайтта жарияланбайды):
Мына код-сандарды енгізуіңізді сұраймыз:*
Жаңарту
* - жазылуы міндетті
Осы тараудағы мақалалар