Сот отырысы басталатын күнi №2 Сарыарқа аудандық соты күзеттi бiрнеше есеге көбейтiптi. Ғимараттың айналасы толған полиция жасақтары. Кiреберiс есiктi қара қағазбен жапсырып тастаған. Iштегi адамдар көрiнбес үшiн.

Дәл осы жерде бiр жыл бұ­рын «Қазақстан темiр жолы» ұлттық компаниясының бұрын­ғы президентi Жақсыбек Кү­ле­кеевтiң iсi қаралған кезде, есiк­тердiң шынылары мөлдiр болатын. Күзет те көп емес едi. Жур­нали­стер үшiн есiк ашық болатын.

Мұхтар Жәкiшевтi конвоймен сот ғимаратына жеткiз­ген кезде де, полиция жасақтары видеотаспаға, фотоға түсiруге рұқсат бермедi. Олар өздерi Мұхтар Жәкiшев­тi көрсетпес үшiн, көлiктi бүркемелеп тұрды.

Жәкiшевтiң зайыбы Жәмиланың айтуынша, алғашқы сот отырысы кезiнде адвокат Нұр­лан Бейсекеевтiң өтiнiм­дерi қаралған. Бiрақ, сотқа адвокаттың өзi сырқаттанып қалуы себептi келе алмаған.

Осыған дейiн Ұлттық қа­уiпсiздiк комитетiнiң уран кенiшiн шетелдiк компаниялар­ға заңсыз сатты деп Жәкiшевке таққан айыптаулары сотта қаралып жат­қан жоқ. Сондықтан да, Жәкiшевтiң зайыбы Жәмила жұбайының iсiнде ешқандай мемлекеттiк құпия жоқ, iс ашық қаралу керек дегендi айтып отыр. «Сот iстi жабық қарап жат­қан себебi, олар өздерiнiң былықтарының ашылып қалатынынан қорқатын шығар», – дейдi Жәмила.

 

Мұхтар Жәкiшевтiң адвокаты Нұрлан Бейсекеев өткен жылдың желтоқсан айында соттың алдын ала тыңдауынан кейiн Астана қалалық сотына бiрнеше өтiнiм берген.

Оның бiрiншiсi – сот отырысын Алматы қаласы Алмалы аудандық сотына ауыстыру. Екiншiсi – iстi жүргiзетiн судья Нұр­лан Жолдасбековке наразылық бiлдiрген болатын. Себебi, алдын ала тыңдау кезiнде адвокат Мұхтар Жәкiшевтiң оққағары Талғат Қыстаубаев үшiн сот отырысын қазақ тiлiнде жүргiзу жөнiнде өтiнiш жасаған. Бiрақ, судья бұл өтiнiштi қанағаттандырмай тастады. Нұрлан Бейсекеев судья Жолдасбековтiң осы шешiмi арқылы Талғат Қыстаубаевтың Конституциялық құ­қығын, Қазақстан заңдарын өрескел бұзды деген болатын. Ал Талғат Қыстаубаевтың жары Сара Сағындықованың айтуынша, бүгiнгi күнге дейiн жұбайы iспен мемлекеттiк тiлде таныса алмай келедi. «Сот отырысы орыс тiлiнде өтедi деп, күйеуiме қазақша сөйлетпей жатыр. Оған аудармашы берген екен. Бiрақ, ол дұрыс аудармайды екен. Адвокаты да бiрауыз қазақ тiлiн бiлмейдi. Өзi бұл iстерге мүлдем қатыспайды. Ал бiздiң отбасы ұсынған адвокатты қабылдамай отыр», – дейдi Сара Сағындықова. 

 

Астанаға әкелерiн көру үшiн Мұхтар Жәкiшевтiң бес баласы да келiптi. Бiрақ олар әкелерiн көре алмады. Жәмила жұбайымен кездесу жөнiнде судьяға өтiнiш жаз­ғанын, бiрақ судья өзiнен сырт айналып, қашып кеткенiн айтады. Ал Мұхтар Жәкiшевтiң үлкен қызы Әйгерiм соттың әдiлеттi шешiм шығаратынына үмiттенедi. «Бiздiң елде соттардың сатылатынын бәрi бiледi. Бiрақ, соған қарамастан, судьяның ар-ұжданы ояна ма деп үмiттенемiн. Өйткенi, бұл iстi барлығы қарап отыр. Әкемдi қолдайтындар көп», - дейдi Әйгерiм. Ол өздерiнiң әкелерiн көре алмай арманда қалып отырғанын да жасырмады. «Соттың есiк, терезелерiнiң барлығын қара түспен бояп тастапты. Әкемiздi әкелген кезде, сот ғимаратындағы жарықты сөндiрiп тас­тады», – дейдi Әйгерiм.