Н.Назарбаевтың 1999 жылы 5 мамырдағы бұйрығымен марқұм Рахымжан Мұсаұлы Қошқарбаев­қа Қазақстанның Халық Қаһарманы атағы берiлдi. Содан берi бiршама жылдар өттi. Бiрақ, әлi күнге дейiн батыр ағамызға кiндiк қаны тамған Астана қаласында тым болмаса бiр көшенiң аты берiлмеуi жанымызға қатты батады. Ақмола қаласында туып, Екiншi дүниежүзiлiк соғыста Рейх­стагқа ту тiккен асыл азаматқа Астана қаласында ескерткiш орнатылса, нұр үстiне нұр болар едi. Есiл өңiрiнде жастық шағы өткен батыр туралы кино түсiрсе де артық болмайды. Бiз «жастардың бо­йында ерлiкке тән қасиеттер жоқ» деп кiнә тағамыз. Оған кiнәлi өзiмiз емес пе? Қазақтың батыр ұлы Рахымжан Қошқарбаевтың кiм екенiн, қандай азамат болғанын жастар бiлуi керек қой...