Ол ең алдымен 2012 жылы ақырзаман болады деген сыбыстың төркiнi қайдан шыққанына тоқталды. Сөйтсе, ежелгi шумерлер ақырзаманның боларын дәл болжады деген сөздi алғаш рет фантаст Зекария Ситчин айтыпты. Ол өзiнiң 1976 жылы жарық көрген “12- ғаламшар” атты кiтабында “ғылымға белгiсiз әлдебiр ғажайып шумер манускриптiн тапқанын, онда Нибиру ғаламшары туралы мәлiметтер бар екенiн” жазған. Оған сенсек, бұл ғаламшар да Жер, Марс секiлдi Күндi айнала қозғалады, бiрақ оған күндi толық бiр мәрте айналып шығу үшiн 3 600 жылдай уақыт кетедi екен. Сол себептi де осы уақытқа дейiн жұмбақ ғаламшарды әлi ешкiм көре алмаған көрiнедi.

Нибиру деген сөз вавилон астрологтарының жазбаларында да кездеседi. Зерттеушiлер оны вавилондықтар құдай деп таныған Мадукпен тығыз байланыс­тырады. “Энума элиш” атты бұл жазба бiздiң жыл санауымыздан 668-627 жылдардың аралығында жазылған. Дэвид Моррисон шумерлердiң астрономияда жеткен жетiстiктерiне күмәнмен қарайды. “Шумерлер Нептун, Уран және Плутон туралы ештеңе де бiлген жоқ. Олар ғаламшарлардың Күндi айналып қозғалатынынан да бейхабар болған”, – дейдi ол.

1983 жылдары бұқаралық ақпарат құралдары “НАСА Күн жүйесiндегi 10-ғаламшарды тапты, оны “Икс” ғаламшар деп белгiлеп, артынша Зена немесе Эрида деп атамақ болған. “Бұл атышулы Нибиру емес пе?” деген сауал туатыны заңдылық. Бұл оқиға шындығында былай болған: 1983 жылы НАСА IRAS деп аталатын аппаратты ғарышқа ұшыр­ған. Ол 350-ден аса инфрақызыл сәулелер көзiн тапқан. 10-ғаламшар туралы сыбыс 1984 жылы тарайды. Сол кезде кейбiр ғылыми басылымдар IRAS тап­қан нысандар ғылыми классификацияға жатпайтынын, оның бiзге беймәлiм ғаламшар болуы мүмкiн екенiн жазған. Алайда кейiннен Жерде және ғарышта ұзақ уақыт бойы жүргiзiлген ғылыми зерттеулер ол нысандардың өте алыс қашықтықта орналасқан галактикалар екенiн анықтады. Эридаға келсек, ол – Күн жүйесiнiң шетiндегi құртақандай ғаламшар. Көлемi Айдан да кiшi. Өзiнiң қалыптасқан орбитасы бар. Сондықтан Эрида Жерге 4 миллиард мильден артық жақындамақ емес. “Жалпы алғанда, Нибиру – ойдан шығарылған нәрсе. Қазiргi заманда астрофизиканың жақсы дамығанын ескерсек, Күн жүйесiнде “көрiнбейтiн” немесе “ашылмаған” 10-ғаламшардың болуы мүмкiн емес”, – дейдi америкалық ғалым.

Нибиру туралы аңызға ғылыми реңк беретiн тағы бiр жайт – Google Sky және Microsoft Telescope бағдарламасы ұсынған ғарыштың картасында, яғни жерден қарағандағы толық көрiнiсiнде қараңғы аймақ бар. Нибиру осы түнектiң артында жасырынуы ықтимал делiнедi. НАСА қызметкерi ол аймақта Нибирудiң жасырынуы мүмкiн емес деп есептейдi. Себебi, осы түнек 2007-2008 жылдың қыс мезгiлiнде Жер шарының әр нүктесiнен зерттелген. Шын мәнiнде, ғарышта мұндай қараңғы аймақ жоқ, ол картаға компьютердiң қателiгiнен пайда болған. Жақында бұл кемшiлiк түзетiлуге тиiс.

Мая күнтiзбесiне келсек, ол күнтiзбе болашақты болжау үшiн емес, уақытты есептеу үшiн жасалған. “Ия, үндiс күнтiзбесi қазiргi қолданыстағы күнтiзбеден әлдеқайда күрделi. Және жылдың ұзақтығын бiзден гөрi дәл есептейдi. Бiрақ, бұл – осыған қарап болашаққа болжам жасауға болады деген сөз емес. Ақырзаман болады деген сыбыс бар-жоғы Мая күнтiзбесi 2012 жылмен аяқталатын болғандықтан шықты. Менiң үстел үстiндегi күнтiзбемдегi соңғы күн – 2009 жылдың 31 желтоқсаны деп көрсетiлген. Бұған қарап қорытынды жасауға бола ма?!” – дейдi Д.Моррисон.

Жұрт айтып жүргендей, 2012 жылы ешқандай “ғаламшарлар парады” болмайды. “Жер Сүт жолының ортасына енедi екен” деген әңгiме де бос сөз болып шығып отыр. Бiздiң Күн жүйемiз Сүт жолы галактикасының бiр шетiнде орналасқан. Дәлiрек айтқанда, галактика “ортасынан” 30 мың жарық жылындай қашықтықта. Әрi галактика орталығын айнала қозғалып жүремiз. Сондықтан арақашықтық ұдайы бiр қалыпты.

“2012 жылы Күндегi магниттi белсендiлiк барынша артып, Жердiң магниттi полюстерi ауысады екен. Сонда адамзаттың тағдыры не болмақ?” деген сауалға НАСА өкiлi былай деп жа­уап бердi: “Шындығына келсек, Күннiң магниттi белсендiлiгi әр он бiр жыл са­йын барынша артып тұрады. Бiрақ бұдан Жерге ешқандай қауiп жоқ. Қатер төнсе, тек Ай үстiнде немесе ашық ғарышта жұмыс iстеп жүрген ғарышкерлерге ғана төнуi ықтимал. Жақын арада жердiң магниттi полюстерi ауысады деген пiкiр де шындыққа жанаспайды.

“2012 жылы метеорит Жерге соғылады” деп үрейленушiлер де көп. Комета мен астероидтар Жерге жиi соғылып жатады. Бiрақ өте iрi ғарыш нысанының соқтығысуы өте сирек құбылыс. Алапат апатқа ұрындыратындай қатер байқалмайды”, – деп сабырға шақырады НАСА агенттiгi.