ВВС “Аюлармен серуен” атты деректi фильм түсiрдi. Онда америкалық биолог Линна Роджерстiң аюлар туралы кең таралған аңыздарды жоққа шығарып, аю мiнез-құлықтарының беймәлiм қырларын аша түскенi көрсетiледi. Ғылымда айтылып жүрген кейбiр жаңсақ жайттарды ысырып тастап Роджерс мынадай батыл қадам жасайды. Миннесота орманында өмiр сүретiн аю тобының сенiмiне кiредi, оларға тамақ бередi.

Ұзақ уақыт жүргiзген зерттеуiнiң қорытындысына сенсек, аюлар мүлде агрессивтi емес әрi балды да ұнатпайтын болып шықты.

“42 жыл бойы аюларды зерттедiм. Бiрақ, мен аюдың адамға шабуыл­дауына мәжбүрлейтiн тәсiл таппадым. Мен оларға қысым көрсеткен сайын, олар тек қана менен тезiрек қашып құтылуға асығатын. Олардың тiстеуi немесе итерiп жiберуi мүмкiн. Бiрақ, адамға бас салып шабуыл жасамайды. Жасқандырып, өзi қашып, бой тасалауы үшiн ғана айбат шегедi”, – дейдi ол.

 

Ғаламдық жылыну жөнiндегi сарапшы Джеймс Хансен: «Ғасырдың аяғында теңiздiң деңгейi 7 метрге көтерiле­дi», – деп болжам жасады. Ғалым мұндай апаттың алдын алуға болады деп есептейдi. Ол үшiн көмiр сутектi шикiзатты, ең алдымен, көмiрдi пайдалануды тоқтату керек. Сонда атмосфераға көмiр­қыш­қыл газының таралуы азаяды. Жиырма жылдан соң температура төмендеп, Жер шары апаттан аман қалады.

Олай етпесе, Антарктида мұзы ғасырдың аяғына дейiн толық ерiп кетедi. Мұның кесiрiнен теңiз деңгейi 6-7 метрге көтерiледi. Қазiрдiң өзiнде мұзды құрлық жыл сайын 200 текше шақырымдай көлемiнен айырылуда. Греландия мұздарының еруi жығылғанға жұдырық болуда.

 

Үлкен жарылыстан бұрын ғалам адам алақанына сыяатындай кiп-кiшкене болған – оның көлемi 10 сантиметрден аспаған. Нобель сыйлығының лауреаты, физик, Годдард атындағы ғарыштық ұшулар орталығының астрофизигi Джон Мазер осылай дейдi. Ол үлкен жарылыс теориясын ғаламның барлық сырын түсiндiрiп бере алатын жалғыз ғана теория деп есептейдi. “Тұрқы он сантиметр ғана болатын материядан кеңейiп бара жатқан мына ғаламат әлем жаралды”, – дейдi ол. Кiшкентай ғана материядан ғалам қалай жаралған, сонда? Мазердiң пiкiрiнше, ғалам негiзiнен бос, кеуек. Сондықтан ғылыми тұрғыдан алғанда, жұлдыздардың бiр-бiрiнен ғаламат қашықтықта орналасуы, сондай-ақ атомдардың да кеуек екенi адам нанғысыз жайт емес.