Күлемiз ғой, әрине... Бiрақ сiрескен “сценариймен” өтетiн әкiмнiң есебi кей кездерi      осын­д­айымен қызық. Жамбыл облысының әкiмi Қанат Бозымбаевтың да қайбiр күнгi “есебi” осындай сүреңсiз өтетiн шығар деп ойлағанбыз. Оның әкiм болғанына небәрi екi айдан ендi асты. Яғни, “өткен жылы мынадай уәде берiп едiңiз, орындалмады ғой” деп жұрттың алқымнан алмайтыны анық. Десекте “көп қорқытады, терең батырады” деген бар, Бозымбаев халық алдында өзiн қалай ұстайды, қалай жауап бередi?! Жоқ, жас әкiм әңгiмеге де, әзiлге де бар екен. “Менiң атым Қожа” киносындағыдай Бозымбаев та үйiнiң есiгiн iшiнен құлыптап, айнаның алдында оңаша “жиналыс” ашып, әбден дайындалып алған ғой деймiн. Осы екi айда әкiмшiлiктiң алдындағы шыны жәшiкке түскен сұрақтарға қол астындағылар әкiмнiң атынан жауап жазып қойған екен, Бозымбаев соны оқып бердi. Арасында бiреу облыс әкiмiне “бос уа­қытыңыз бар ма?” деп сұрақ жазған екен, жауап жазған әкiмшiлiк қызметкерлерi “бос уақытым бар” десек әкiмнен бәлеге қаламыз” деген болуы керек, “жоқ” деп жазып жiберiп­тi. Сұрақ-жауапты судыратып отыр­ған әкiм осы тұста “Неге “менiң бос уақытым жоқ” деп жазғансыңдар?.. Бос уақытым бар, бiрақ, өте аз. Қолым тисе, отбасыммен бiрге болып, кiтап оқып, спортпен шұ­ғыл­данғанды жақсы көремiн” деп ағынан жарылды. Осыдан-ақ облыс басшысының жасқа тән жарқылдап, еркiн қимылдағысы, қатып қалған “сценариймен” жүргiсi келмейтiнiн аңғардық. Бозымбаев әңгiме арасында күлiп отырып “маған бiрталай құрылыс басшылары келдi, бәрi “бiзге не тапсырма бар?” дей бередi... Солардың бәрi бiр-бiр үйдiң ауласын жөндеп, темiрлерiн орнатып, ретке келтiрiп берсiн” деп құрылысшыларға да ретiмен жүк артып тастады.

Әрине, ел алдында есеп беру­дiң жауапкершiлiгi – есекке теңдеп артқан жүктен де ауыр. Есеп беру – артыңа бiр бұрылып, өткен тiрлiктi түгендеу, саралау, алдыға жол ашу деген сөз. Қанат Бозымбаев осы жолы облыстың денсаулық сақтау мен бiлiм саласын қатты сынға алды. Өткен жылы облыста ана өлiмi 2 есеге өссе, ҰБТ қорытындысы бойынша жамбылдық мектеп бiтiрушiлер республика бойынша төменгi орындардан көрiнiптi. Әрине, Жамбылда жап-жақсы тiрлiктер бар. Әр саланың өз жетiстiгi же­терлiк. Бiрақ, шынын айту керек, Жамбылдың шағын кәсiпкерлiк саласы, iрi жобаларға инвестиция тарту мәселесi тым-тым ақсап жатыр. Есеп беруден бiр күн бұрын Таразға бiрiншi вице-премьер Өмiрзақ Шөкеев келiп, облыс­тағы инвестициялық жобаларды iске асыру барысымен танысты. Сол кезде еңбек ардагерi Әлмұхан Исақтың “Бiздiң облысымыз басқа аймақтарға қарағанда экономикалық және әлеуметтiк жағынан дамуда артта қалып келедi. Бiздiң облысты “ұйқыдағы ару” деп атайды” деген сөзi көп нәрсенi аңғартса керек. Бұл турасында облыс әкiмi “Мемлекеттiк органдардың инвестициялық стратегиясы қажеттi деңгейде дамымаған, барлық атал­ған мiндет­тер негiзiнен қағазда қалды. Бiзге отандық қаржы институттарын ғана емес, шетел инвесторларын да тарту қажет” деп, бұл саланы шындап қолға алатынын бiлдiрдi. Шынында Жамбылдың химиясы мен металлургиясын мықтап қолға алса, облысты өрге сүйреп шығатын “қара өгiздiң” нағыз өзi болар едi. Сондай-ақ, Астана, Алматыдағы iрi кәсiпкер­лердiң Жамбылда бизнес жүргiзу­ге жүректерi дауалай бермейтiнi тағы жасырын емес. Бiрi жергiлiктi бандылық топтардан қорқатынын айтады, бiрi жергiлiктi шенеунiктер­мен тiл табыса алмайтынын айтады. Осыдан екi жыл бұрын Алматыдағы “Атакент” фирмасы Таразда iрi жобаларды қолға алып, оған 10 миллиард теңгеге дейiн қаржы салмақ болды.

Бiрақ облыс басшыларының ықылассыздығынан бұл жобаның бәрi аяқасты болды. Сонымен Қ.Бозымбаев ең алдымен осы саланы мықтап қолға алып, Жамбыл облысын кәсiпкерлер үшiн еркiн аймақ деп жариялап, алдағы уақытта республикалық бизнес форум өткiзбек ойы бар. Сондықтан жағдайың бар ма, қаржы құйып, бизнес жасағың келе ме, құрметтi кәсiпкер мырзалар, Жамбылға кел, жұмыс бар, кәсiп бар.

Жалпы алғанда Қ.Бозымбаев осы уақыт iшiнде аудан-қаланың бәрiн аралап, аймақтың да, жергiлiктi әкiмнiң де жұмысымен танысып бiттi. Бiр жақсысы, ол аудандағы әрбiр тiрлiкпен танысып қана қоя сал­ған жоқ, солардың шешiлмей жатқан мәселесiне назар аударып, әсiресе, әрбiр шаруаға әкiмнiң “вопрос нет, көмектесемiз” дегенi көңiл қуантты. Ауылдағы шаруалардың қолы қысқа екенi белгiлi. Барлық аудандағы iрi шаруашылықтар облыс әкiмiне өздерiнiң жақсы тiрлiктерiн көрсетiп қана қоймай, несие, қаржы мәселесiнде, басқа да шешiлмей жат­қан қиындықтарды алдыға тартты. Кейбiр аурухана, емханалар медициналық құрал-жабдықтардың жетiспейтiнiн, ғимараттарының ескi екенiн айтты. Облыс әкiмi сол жерде орынбасарларына нақты тапсырмалар берiп жатты. Бұл ендi көз үйренген жағдай. Айтқаны орындалып, қолға алған тiрлiгi iске асып жатса ғана, халық әкiмге сенетiн болады.