Сейсенбi күнi «Республика» ақпараттық порталына М.Әбля­зовтың Бас прокурор Қайрат Мәмиге, ҰҚК төрағасы Әдiл Шаяхметовке, Қаржы полициясының төрағасы Қайрат Қожамжаровқа және Iшкi iстер министрi Серiк Баймағамбетовке жол­даған хаты жарияланды. Хатта былай делiнген: «Соң­ғы айларда менiң қолыма тиген дәйектi құжаттарды Қазақстанның құқық қор­ғау органдарына берудi өзiмнiң азаматтық борышым деп санаймын. «Самұрық-Қазына» әл-ауқат қоры төр­ағасының орынбасары, «ҚазМұнайГаз», «Қазақстан темiр жолы», «Самұрық энерго» және тағы да басқа ұлттық компаниялардың директорлар кеңесiнiң төрағасы, «Kaz­Energy» коммерциялық емес ұйымының қожасы Тимур Асқарұлы Құлыбаев басқаратын қылмыстық топтың iс-әрекетiн әшкерелемекпiн...».

Мұхтар Әблязовке сенсек, 2003-2005 жылдары Т.Құлыбаев Қытайдың ұлттық мұнай компанияларының кейбiр басшыларымен келiсiп алып, «Ақтөбемұнайгаз» АҚ-ның пакет акцияларын нарықтағы құнынан әлдеқайда арзан бағаға сатып жiберген. Осының өтемi ретiнде ол 165,9 миллион доллар пара алған және салықтан жалтарған.

Әблязов осылайша Құлыбаевтың iс-әрекеттерiн тiзбелей келе, дәлел ретiнде бiрнеше құжатты қоса тiркептi. Дәлiрек айтқанда, ағылшын және орыс тiлiндегi бас-аяғы 13 құжат. Барлығы — 56 бет.

Iле-шала, кеше Әблязов бiр бума құжатпен қоса тағы да үшбу хат жолдады ел жаққа. Бұл жолғы хаты Сенат төрағасы Қасымжомарт Тоқаевқа, Мәжiлiс төрағасы Орал Мұхамеджановқа, сондай-ақ, «Нұр Отан» партиясының сыбайлас жемқорлықпен күрес республикалық қоғамдық кеңесiне бағытталыпты.

«Тағы бiр бума құжат жiберiп отырмын. Бұл құжаттар Тимур Құлыбаевтың «ҚазМұнайГаз» ұлттық компаниясынан аса iрi көлемде мемлекет мүлкiн ұрлағанын дәлелдейдi.

Бұл қылмыстарды Құлыбаев «ҚазМұнайГаздың» вице-президентi, кейiннен «Самұрық-Қазына« әл-ауқат қоры төрағасының орынбасары және «ҚазМұнайГаз» ҰҚ директорлар кеңесiнiң төрағасы болып тұрған кезiнде жасаған», — дептi М.Әблязов бұл жолғы хатында.

Әблязовтiң айтуынша, Т.Құлыбаев жекешелендiрiп алған активтердiң бiрi — «КазСтройСервис» АҚ. Бұл мемлекеттiк компания 2001 жылы шiлде айында құрылыпты. Компанияның сол кездегi құрылтайшысы «Транспорт Нефти и Газа» Ұлттық компаниясы екен. Кейiннен компанияны қайта құрылымдаған кезде «КазСтройСервис» АҚ-ның жалғыз акционерi тек «ҚазМұнайГаз» ҰҚ болып қалған.

2005 жылдың ақпан айында «ҚазМұнайГаз» ҰҚ «КазСтройСервис» АҚ-ның 100 пайыз акциясын «Меркурий» ЖШС-не бiр миллиард екi жүз миллион теңгеге сатқан. Ал «Меркурий» — Тимур Құлыбаевтың меншiгi.

«Сатылған кезде компанияның нарықтағы бағасы 1 миллиард АҚШ долларына шамалас болған. Бұл — «Merix International Ventures Limited» компаниясының «Credit Suisse» банкiне жазған хатынан мәлiм. Ал бұл компания — Т.Құлыбаевтың Британдық Виргин аралдарында тiркелген жекеменшiгi», — дейдi М.Әблязов.

Бұдан әрi ол Т.Құлыбаевтың «ҚазМұнайГаз» ҰҚ-ға өзiнiң иелiгiндегi «Kazakhstan Petrochemical Industries» АҚ-ның 50 пайыз акциясын қалай өзiндiк құнынан жоғары бағаға сатқанын тәптiштейдi. Сауда жүргiзiлген кезде Т.Құлыбаев Ұлттық компанияның директорлар кеңесiнiң төрағасы қызметiнде болған.

М.Әблязов екiншi хатын былай қорытындылапты: «Құлыбаев бастаған қылмыстық топтың әрекетi «аса ауыр қылмыс» деген дәреженiң аясынан шығып, ұлттық қауiпсiздiкке қатер төндiре бастады. Парламенттен арнайы комиссия құрылып, мен жолдаған құжаттарды мұқият тексерудi және оған саяси баға берудi сұраймын».

Арнайы комиссия құрылсын, ол мұқият тексеру жүргiзсiн делiк. Деректерi дәлелденбесе қайтедi? Жала жапқаны үшiн Әблязовтiң өзi айыпталмай ма? Ал егер «ұлттық қауiпсiздiгiмiзге қатер төндiргенi» дәлелденсе, Т.Құлы­баевқа не шара қолданады? Шетел асырып жiберген соң қылмыстық iс қозғап, сырттай соттай ма? Р.Әлиев сияқты.

Әблязовтiң хаты мекенжайына уақытында жеткенiне күмән жоқ, хат жолданғандардың бәрi ғаламтормен жұмыс iстей алатын сауатты адамдар ғой. Ендi құқық қорғау органдары басшыларына қайтпек керек? Ең жоғарыдан бұйрық түспесе, қауқарлы күйеубаланың қойын-қонышын қалай тiнтедi?

Ендi мына қызыққа қараңыз, Әблязов алғашқы хатын жолдаған күнi республикалық телеарналардың бiрi бұл туралы тиiп-қашып айтып жiбердi. Әрине, Құлыбаевтың атын атап, түсiн түстемедi. Бұл ненi көрсетедi? Құлыбаевтан мықты бiреу бар ма бiздiң қоғамда? Бiр адам бар ғой... Ортаншы күйеубала да бажасы секiлдi қайын атаның кәрiне iлiгiп қалған жоқ па осы?