Ұлттық құраманың бас бапкерi Мұратбек Қасымханов бұл жарысқа елiмiздiң маңдайалды палуандарын апарғалы отыр. Ұлттық құраманың тiзгiнiн ұстағанына көп уақыт өте қоймаған бас бапкер жарыс жайлы өз ойын былай жеткiздi:

– Қазiр палуандарымыз Венгрияда оқу-жаттығу жиындарын өткiзiп жатыр. Гран-при жарысы – өте мәртебелi жарыстардың бiрi. Сондықтан палуандарымызға көп күш жұмсауға тура келiп тұр. Жақында Ираннан оралдық. Ол жақта бiздiң палуандар командалық есепте екiншi орын алды. Биылғы жылдың ең бас­ты жарыстарының бiрi – Азия ойындары екенi сөзсiз. Қараша айына дейiн палуандарды бiраз сынақтан өткiзiп аламын. Иранда өткен жарыспен Венгрияда өтетiн жарыс Азия ойындарына дейiнгi дайындық есебiнде жүргiзiлуде. Гран-при жарысына 66 келi салмақтағы Дархан Баях­метовтi алып барайын деп едiм. Алайда Дархан жарақатынан толық айыға алмағандықтан оған сәл де болса демалыс бергендi жөн көрдiм. Себебi, Азия ойындары ке­зiнде алтын медальға бiрден бiр үмiткер – осы жiгiт. Оның бiзге жақсылап жазылғаны керек.

–             55 келi салмақта Марат Гарипов Иранда өткен турнирде күмiс медальмен оралды. Сол жiгiттi тағы бiр рет сынап көруге бел будым. 60 келiде Алмат Кебiсбаев белдеседi. Олимпиада ойындарының жә­не әлем бiрiншiлiгiнiң қола жүлдегерi Нұрбақыт Теңiз­баев (суретте) 66 келiге шығады. Нұрбақыт әлем бiрiншiлiгiнен кейiн жарысқа әлi шыққан жоқ. Салмағы сәл өскендiктен қинамай 66 келiге белдессiн деп шештiк. Уакыт өте келе өзiнiң үйреншiктi салмағына оралады деп сенемiн. 74 келi­де жастар арасында әлем бiрiншiлiгiнiң күмiс жүлдегерi Досжан Қортықов пен Асқат Дiлмұхамбет­ов­ке сенiм арттық. 84 келiде Қазақстан чемпионы Алхазур Өздиев барады. 96 келi салмақта Марғұлан Әсембеков пен Әсет Мәмбетов қатысады. Марғұлан Иранда өткен жарыста жарақат алып қалған едi. Қазiр тәуiр болып қалды. Екi-үш белдесу өткiзуге шамасы жетедi.