10 наурыз 2010
Кебiсбаев күмiспен оралды
Қазақстанның грек-рим күресiнiң палуандары Венгрияның Сомбателли қаласында Гран-при жарысынан оралды. Мұратбек Қасымханов баптайтын елiмiздiң палуандарына бұл додада тек жалғыз күмiс медаль ғана бұйырды. 60 келi салмақта белдескен отандасымыз Алмат Кебiсбаев финалда әзiрбайжан палуанынан ұтылып қалды.
Алғашқы белдесуде колумбиялық қарсыласының жауырынын жер иiскеткен Алмат екiншi белдесуiнде украин палуаны Данило Кромовты ұтып, жартылай финалға жолдама алды. Финалға берiлетiн жолдаманы норвегиялық палуанмен сарапқа салған жерлесiмiз скандинавиялық қарсыласын айналып өтiп, финалға шықты. Өкiнiшке қарай, финалда отандасымыздың әзiрбайжан палуаны Хасан Әлиевке әлi келмедi. Қалған салмақтағы палуандарға келер болсақ, 55 келi салмақтағы Марат Гарипов жүлделi орынға бiртабан жетпей тоқтады. Жартылай финалға дейiн өзiне тең келер қарсылас таппаған Маратты финалға кәрiс палуаны жiбермедi. Жерлесiмiз кәрiс палуанынан жеңiлгеннен кейiн жүлделi үшiншi орынды жеңiп алуға мүмкiндiгi бар едi. Алайда, қола медаль үшiн болған белдесуде Мараттың жолын жапон палуаны бөгедi. Сөйтiп жерлесiмiз жарыс қорытындысы бойынша, небәрi бесiншi орынға табан тiредi.
66 келi салмақта ел намысын қорғаған әлем бiрiншiлiгiнiң қола жүлдегерi Нұрбақыт Теңiзбаев екiншi белдесуiнде украин жiгiтi Сергей Красильниковтан жеңiлiп, жүлдесiз қалды. Нұрбақыт бiрiншi белдесуiнде поляк Даниэл Рутковскийдi ұтқан едi.
74 келi салмақтағы Досжан Қортықов, Асқат Дiлмұхамбетов және Саят Сарманбеков те мажар елiнен бос қайтты. 84 келi салмақта күрескен Алхазур Өздиев те медальдiң аулынан алыс қалды. 96 келi салмақта кiлемге шыққан Әсет Мәмбетов екiншi белдесуiнде жеңiлдi. Ал дәл осы салмақтағы Марғұлан Әсембеков пен 66 келiдегi Дархан Баяхметовтi бас бапкер жарақаттарына байланысты кiлемге шығарған жоқ.
