2 ақпан 2010
Қыздарымызға қола бұйырса, жiгiттерiмiз құралақан қайтты
Ресейдiң Красноярск қаласында еркiн күрестен және әйелдер күресiнен Иван Ярыгиндi еске түсiруге арналған халықаралық турнир өттi. Әлемнiң жиырмадан астам елiнiң палуандары белдескен айтулы додада қазақстандық палуандар үш қола медальға ие болды.
Өкiнiшке қарай, қазақ елiнiң еркiн күрес шеберлерi Красноярск жерiнде өткен жарыстан құралақан қайтты. Қоржынымызға түскен үш бiрдей қола медальдi Қазақстан құрамасының бойжеткендерi иелендi.
Жарыстың бiрiншi күнi кiлемге шыққан жерлестерiмiз арасынан 51 келi салмақтағы Татьяна Бакатюк пен 67 келi салмақтағы Елена Шалыгинаның жолы болды. Т.Бакатюк бiрiншi белдесуiнде молдовалық Наталья Будуды тiзе бүктiрсе, екiншi белдесуiнде кiлем иесi Замира Рахманованы ұтты. Жартылай финалға берiлетiн жолдаманы моңғол палуанымен сарапқа салған жерлесiмiз қарсыласын айқын басымдықпен ұтып, үздiк төрттiкке кiрдi. 67 келiде Олимпиада ойындарының және әлем бiрiншiлiгiнiң қола жүлдегерi атанған Елена Шалыгина да қатарынан үш белдесуде жеңiске жетiп, жартылай финалға шықты. Өкiнiшке қарай, жартылай финалда екi жерлесiмiз де ұтылып қалды. Т.Бакатюк жапон палуанынан жеңiлсе, Е.Шалыгинаның моңғол палуанына шамасы жетпедi. Қола медаль үшiн болған айқаста Татьяна Бакатюк Ресей палуаны Екатерина Краснованы екi кезеңде ұтып, Қазақстан қоржынына алғашқы жүлденi салды. Өз кезегiнде Елена Шалыгина да жапон палуанын жеңiп, екiншi қола медальдi иелендi.
Турнирдiң екiншi күнi 48 келi салмақта күш сынасқан қос бойжеткенiмiз Элеонора Әбутәлiпова мен Жұлдыз Ишимова алғашқы белдесулерiнде жеңiлiп, жүлдеден үмiтiмiз үзiлгендей едi. Алайда, Жұлдыздан айласын асырған солтүстiккореялық Син Хан Со финалдан бiр-ақ шығып, Жұлдыздың қола медаль үшiн күресуге жолын ашты. Өзiне берiлген соңғы мүмкiндiктi мүлт жiбермеген Ж.Ишимова Қазақстан құрамасына үшiншi қола медальдi сыйлады.
