– Егемендi ел болдық деп мақтанғанымызбен, үш жүз жыл­ға созылған Ресей патшалығының, Кеңестiк тоталитарлық жүйе кезiндегi ұлтыздандыру сая­сатына әлi күнге дейiн баға берiлген жоқ. Ол бiздiң мемлекетi­мiз­дiң ең бiр бейшара тұсы деп айтуға болады. Тәуел­сiздiк алғанымызға он сегiз жылдан асса да, сол ұлтыздандыру саясаты әлi де жалғасып келедi. Жастарымыздың көп бөлiгi өз ана тiлiнде сөйлей де, жаза да алмайды. Тiптi, соны жетiстiк санайтындары да бар. Желтоқсан көтерiлiсi қазақ тарихына алтын әрiппен жазылатын күрделi оқиға. Сол кезеңде 18-20 жастағы азаматтар ұлттық мүдденiң тапталуына, ана тiлi­мiз­дiң аяқасты етiлуiне қарсы бой көтерген. Қазiргi жастар ше? Президент ауылды жерлерге, оқу орындарына барғанда жастар бiр-бiр жалауды көтерiп алып, «Нұрсұлтан – Қазақстан» деп ұрандатып, күлкiлi жағдайға қалады. Қастарына келiп тұрған мемлекет басшысына сұрақ қойып, елдiң, халықтың мұң-зарын жеткiзудiң орнына жағымпаздықпен айналысады. Елдiк, ұлттық мүдденi сатып, үлкен «көкелерiне» ұқсап жағымпазданады. Бiрақ, жастардың барлығы да осындай деуден аулақпын. Жастардың iшiнде де қанатты, пайымды, парасатты жастар өсiп келе жатқанына соңғы кездерi көз жеткiзе бастадық. Жанболат Мамай бастаған жас азаматтар тобы ұлттық, елдiк мүддеге бел шеше кiрiстi. Бұл – қуанарлық жағдай. Мұн­дай жастардың бас көтеруi ұлттық, мемлекеттiк мүдденiң қанаттануы деп бiлемiн. Жоғарыда айтқан қазақ тiлiнде сөйлей, оқи алмайтын қазақ жастарының iшiнде де ұлттық сезiмi жоғалмағандары бар. Бұдан былай сол жастардың барлығын бауырымызға тартуымыз қажет. Себебi, оларды осындай күйге түсiрген ұлтсыздандыру саясатына олардың кiнәсi жоқ. Ондай жастарды мүмкiндiгiнше өзiмiздiң қатарымызға қосайық.

Мен қашанда жастармен бiргемiн. Жастардың халықтық мүддеге жаны ашып, соған бет бұрғанына, соны өзiнiң тағдырына балағанына қуаныштымын және олардың бастамасын түгелдей қолдаймын. Өзiм жастар жағындамын, олардың маған көрсетiп жүрген қолдауына да өте ризамын.

 

Қазiр бiздiң қоғамда билiк болсын, Ақорда болсын жастардың пiкiрiмен санасып жүрген жоқ. Жастарды саясаттан тыс, күрделi мәселелермен еш iсi жоқ деген көзқарас қалыптасқан. Бi­рақ, менiңше бұл – қате пiкiр. Қоғамда қордаланған көптеген мәселелермен қоса, жастардың жеке өздерiне ғана қатыс­ты проблемалар да жетер­лiк. Оларды жастардың өздерi­нен артық ешкiм көтере алмайды. Жастардың белгiлi бiр дәрежеде бойкүйездiгi бар екенiн мойындауымыз керек. Оған қазiргi таңда жастарды алға тартатын Ғани Мұратбаев сынды серкелердiң болмауы себеп пе деймiн. Бiрақ, осы ескертпе хат қабылданған дөңгелек үс­телге жиналған жастарды көрiп қуандым. Мұндай жастардың бар екенiне риза болдым. Ел болашағына алаңдайтын жастардың бар екенiне көзiмiз жетiп отыр. Оның алдында да осы жас­тардың және жетi мыңға тарта студент жастардың қолы қойылған ашық хатты жарияланды. Оған да билiк жауап қат­қан жоқ. Жастардың сая­сат­қа деген салғырттығының басты себебi – көптеген жастардың жұмыссыз, өз бастарының жайын күйттеп кеткендiгiнде. Олар күнкөрiстiң қамымен жүрiп, басқаға назар аудара алмайды. Бiрақ, осы көптеген кедергiлерге қарамастан жастардың билiкке ықпал етуге деген ұмтылысы қуантады. Ал жас­тардың митингiсiне мiндеттi түрде келемiн. Мұндай бастамаларды жеке өзiм де, бiздiң партия да әрқашан қолдауға дайын. Қолымыздан келген көмегiмiздi аямаймыз.

 

– Жастардың ескертпе хатта айтқан мәселелерiнiң барлығы да ащы шындық. Бұл жас толқынның жан айқайы. Мен де көп жылдан берi өз мақалаларымда осы жастардың ескертпе хатында айтқан мәселелерiн көтерiп жүрген адаммын. Сондықтан, жастарды жақсы түсiнемiн. Қазiргi таңдағы мәселелердiң ең күрделiсi – жастардың тағдыры. Қоғамның да ең үлкен ауыртпалығы солардың мойнына түсiп отыр. Оларды ешкiм ойламайды, проблемаларына көңiл аудармайды. Оларға берiлiп жатқан жөнi түзу тәрбие, жасалып жатқан жағдай жоқ. Жастар өздерiнiң жолын дұрыс таба алмаса, сонда бiздiң ел қайда барады? Дөңгелек үстелге жиналған жастардың өз болашағын, ел келешегiн ойлап, осындай хат жолдап жатқаны құптарлық. Олардың бұл бастамасын елдегi титтей де болса ұяты бар, ары бар, шынайы патриоттардың барлығы да қолдайды деп ойлаймын. Жастардың дәл осылай мiнез танытуы алғашқы рет. Осыған дейiн талай азаматтар көтерiлдi. Бiрақ, олар орта буын, үлкен буын өкiлдерi. Ал бұл – жастардың алғаш­қы дауыс көтеруi. Демек, шыдамның да шегi келдi деген сөз. Егер бiздiң билiк дәл осы хатқа, жастардың үнiне жауап қатпаса, онда олар не бiтiрiп, ненi ойлап жүргендерiн бiлмеймiн. Кезiнде, «көш жүре түзеледi» дегендi жиi айтатын едiк. Ал бiздiң қоғам түзелiп жатқан жоқ. Керiсiнше, қисық жағына бұрылып барады. Есi болса билiк жастардың осы үндеуiнен кейiн-ақ ойланып, саясатын өзгертуге тиiс. Жастар ғана емес, бүкiл халық жемқорлыққа негiзделген билiк жүйесiнен әбден шаршады. Халық бiр жыл шыдады, екi жыл шыдады, мiне он сегiз жылдан берi шыдап келедi. Ендi қашанғы шыдауға болады? Көпшiлiктi «бес жылдан кейiн жақсы болады, отыз жылдан кейiн жақсы болады» деп қашанғы алдай беруге болады? Менiң ойымша, мына хатты жазып отырған жастар – сол жылаған халықтың көз жасын құрғатқысы келген азаматтар. Жастардың халықтың болашағына алаңдағанына мың да бiр рахмет! Мұндай жастар болса бiздiң келешегiмiз бар екенiне сенуге тиiспiз.

Алғашқы қадам ретiнде 11 сәуiрде митинг өткiземiз деген ойын да қолдаймын. Оған өзiм де қатысамын. Жалпы, елдегi жастар ғана емес, ел болашағын ойлайтын әрбiр азамат атсалысуға тиiс деп санаймын бұл шараға. Бiрақ, жастар ұятқа қалмас үшiн, ол шараға әбден дайындықпен баруға тиiс. Өздерiн салмақты саясаткер ретiнде көрсетiп, айғай-шуға ерiк бермей, үлкен-үлкен мәселелер жүйелi түрде айтылуы керек. Митингтi басбұзарлық әрекет ретiнде емес, салиқалы жиын ретiнде өтiкiзгендерi дұрыс.

 

– Ең әуелi айтарым, жастардың бұл ескертпе хатты қабылдап, дөңгелек үстелге жинағанына қуаныштымын. Қазақ жастарының елдегi оқиғаларға ықпал етуге деген ұмтылысы қуантады. Бұл жастардың болашағын ойлағанының белгiсi. Бiз дәл қазiр жастарға не ұсынарымызды бiлмей дал боламыз. Бiрақ, олар бiзсiз де өз жолдарын тапқан сияқты. Жастардың бұл бастамасы – тәуелсiз Қазақстан тарихындағы үлкен оқиға. Сондықтан, бұл жастар жан-жақты қолдауға лайық. Жастарға «Алға» партиясының атынан айтарым және жеке өзiм кез келген көмек беруге дайынбыз. Олардың 11 сәуiр күнi митингiге шығамыз деген ойын толықтай қолдап, сол күнi өзiмiз де сол жерден табылатынымызды айтқым келедi. Өзiм жастардың митингiсiнде мiндеттi түрде боламын!