Әлеуметтiк тақырыптарға арналған «Тұрмыс» атты арнайы беттiң беташарын жасап жатқан жайымыз бар. Мақсат – қоғамдық маңызы атан түйеге жүк боларлық өткiр мәселе­лердi тағы бiр қырынан қозғау. Елдiң тыныс-тiршiлiгiн көрсетiп, мұң-мұқтажын айтып, қуанышын жеткiзу.

Дәл қазiр қоғамда халықтың топ-топқа бөлiнiп кеткенi байқалады. Бай-кедей, қала-ауыл, оңтүстiк-солтүстiк, жетiм-жесiр, сатушы-тұтынушы, тағысын тағылар. Әрбiрiнiң тұрмысы әртүрлi. Тiптi жандүниесi, ой-өресi де бөлекше. Бұл да оқырманды бейжай қалдырмайтын өзгерiс.

Сондай-ақ, тұрмысын түзеп, күнкөрiсiн жақсартуда әркiм әртүрлi жол таңдады. Бiреу адал еңбегiмен, тапқырлығымен қара қазанын қайнатуда. Бала-шағасын бағып-қағуда. Барына береке тiлеп, ақ дастарханнан ас iшуде. Ағайын-туысына, ел-жұртына шапағатын тигiзуде. Екiншiсi, керiсiнше, түлкi қулыққа салып, мал-дәулет жинауда. Асып-тасуда. Алайда... Ал үшiншiсi жалқаулыққа салынды. Әркiмге бiр масыл болып, арамтамақ атанды. Төртiншiсi... Бесiншiсi... Жалғастыра берсек, мысал көп. 

Тағы бiр айта кететiн жайт, тұрмыстың жақсы-жаман, түзу-қисық болуы ел мен билiктiң бiте қайнауына байланысты. Егер басшы мен қосшы май мен судай болса тiршi­лiгiнен мән кететiнi анық. Керiсiнше, бiр жағадан бас, бiр жеңнен қол шығарса, тұрмысына сән кiретiнi сөзсiз. 

Қазақ ұшырасқанда: «Тұрмысың қалай? Мал-жаның аман ба?» – дейдi. Бiз де сiздерге осындай са­уал жолдаймыз. Хал-ахуалыңызбен танысып, ой-пiкiр бөлiсуге әзiрмiз.

Данышпандардан «Сананы тұрмыс билейдi» деген сөз қалған. Тұрмысыңызға қарап санаңызды сарсылтқан жайға барлау жасайық. Ал сана арқылы тұрмысты түзеуге болатыны және анық. Бiрiмен-бiрi сабақтас дүниенiң сырын ұғайық.    

Сөз жоқ, газет оқырманымен құнды. Хат-хабар жазып, қоржынымызға салыңыз. Мiндеттi түрде оқимыз. Отандастарыңызға ой-пiкiрiңiздi, ақыл-кеңесiңiздi ашық айтыңыз. Жариялауға әзiрмiз. Бiзбен байланыста болыңыз.