Алматы қаласы әкiмiнiң орынбасары Серiк Сейдуманов «Время» басылымына берген сұхбатында әкiмшiлiктiң Шымбұлақ пен Медеу маңындағы заңсыз салынған құрылыстарды бұзуға қаржысы жоқ деп мәлiмдедi. Ол үшiн жарты миллиард доллардай қаржы керек екен. Таңғаларлығы – прокуратура мен басқа да құқық қорғау органдары тексерген кезде 350 нысанның екеуi ғана ресми түрде рәсiмделмеген болып шыққан. Олар – орта мектеп пен «Медеу» мұз айдыны! Рәсiмделген коттедждердiң бесеуiнде заңбұзушылық бар. Жекеменшiкке сатуға болмайтын жерлердi сатуға рұқсат бергенi үшiн Алматы әкiмiнiң екi орынбасары – Яков Заяц пен Қайрат Бөкенов жұмысынан босатылған. 2008 жылы Алматы әкiмшiлiгi Медеу мен Шымбұлақ маңындағы жекеменшiкке өткен жерлердi шен-шекпенiне қарамастан қайтарып алу туралы қаулы бекiткен-дi. Бiрақ ол қаулы әлi толық орындалмаған. Мәселен, Лейла Храпуновадан 2 489 шаршы метр жердi алғанымен, оның коттеджiнiң маңындағы 186 шаршы метр жердi қалдырған. «Форбс» журналының тiзiмiндегi Алиджон Ибрагимовтан 2 016 шаршы метр жердi алып, 327 шаршы метр жерi бар екiншi жер телiмiне тимеген. Туризм және спорт министрi Темiрхан Досмұхамбетовтiң, бұрынғы ҰҚК басшысы, қазiргi президент кеңесшiсi Амангелдi Шабдарбаевтың, мемлекет басшысының штаттан тыс кеңесшiсi Болат Өтемұратовтың (тағысын тағылар) жер телiмдерi жарым-жартылай ғана алынған.
Уәж айту