Ресейлік миллиардерлер бір күнде үш миллиард доллардан астам қаржы жоғалтты. Bloomberg агенттінің хабарлауынша, бұл жағдай Ресей президенті Владимир Путиннің экономикалық кеңесшісі Андрей Белоусов елдегі ең ірі металлургиялық және тау-кен компанияларына салықты көтеруді ұсынған соң болып отыр. Белоусов осылайша Владимир Путиннің мамырда шығарған жарлығын іске асыруға 500 миллиард рубль шығарып алуға кеңес берген.

Президентке жазған хатында Белоусов бюджетке көбірек қаржы құя алады деген 14 компанияны атаған. Осының салдарынан ол компаниялар акцияларының құны төмендеген, ал әлеуетті инвесторлар олардың кейбірімен бірлескен жобалардан бас тартқан.

Миллиардерлердің нақты уақыт шегінде дәулетінің артып, я кемігенін бақылап отыратын Bloomberg Billionaires индексі бойынша, салыққа қатысты ұсыныстан Новолипецк металлургиялық комбинатының иесі — Владимир Лисин ең көп зардап шеккен. Ол 832 миллион доллар (немесе байлығының 4 пайызы) жоғалтқан. Одан кейінгі орындардағы Магнитогорск металлургиялық комбинатының иесі Виктор Рашников 446 милион доллар, «Северсталь» компаниясының иесі Алексей Мордашов 444 миллион доллар жоғалтқан. Геннадий Тимченко, Әлішер Усманов, Роман Абрамович және Владимир Потанин де қаржылай шығынға ұшыраған.

РБК агенттігінің хабарлауынша, Путин Белоусовтың хатына оның ұсынысымен келісетіні туралы қол қойып берген. Алайда, Кремльдің баспасөз хатшысы Дмитрий Песков бұл ақпаратты терістеді.

Дереккөз:Азаттық радиосы

Алматы қаласы туралы жаңалық оқу

Comments are closed.