“Неге орысша жазылмаған?”: Лавров тағы да дау тудырды
Ресейдің сыртқы істер министрі Сергей Лавров Самарқан қаласындағы «Қайғы жамылған ана» мемориалына бару барысында ондағы мәтіннің тек өзбек және ағылшын тілдерінде жазылғанына назар аударды.
Сергей Лавров бұл жайтты Өзбекстанның Сыртқы істер министрі Бахтиёр Саидовқа ескертті.
«Қарасам, ағылшынша жазу бар. Ал орысша аудармасы жоқ. Ана – ең қасиетті ұғым», – деді Лавров ТАСС агенттігіне берген сөзінде.
Мемориалда жазылған сөз: «You are always in our heart, my dear» – «Сен әрдайым жүрегіміздесің, қымбаттым» деген мағына береді.
Айта кетейік, Сергей Лавров Өзбекстанға екі күндік ресми сапармен барған. Бұған дейін оның өзін-өзі анықтау құқығына қатысты айтқан мәлімдемесі қоғамдық пікірталас туғызып, кей сарапшылар бұл сөзді Солтүстік Қазақстанға жасалған ишара ретінде бағалаған еді.