Қытай мен Солтүстік Корея күштерін біріктірмек
КХДР көшбасшысы Ким Чен Ын мен ҚХР төрағасы Си Цзиньпин Пхеньянда өткен келіссөздер барысында екіжақты ынтымақтастықты одан әрі кеңейтіп, стратегиялық үйлесімді күшейтуге уағдаласты.
Бұл туралы Кореяның Орталық телеграф агенттігі (ЦТАК) хабарлады.
Агенттік мәліметінше, кездесу 8 маусым күні «Кымсусан» құрметті қонақтар резиденциясында өткен. Келіссөздер басталар алдында тараптар бір-бірімен амандасып, екі елдің мемлекеттік тулары аясында естелік суретке түсті.
Кездесуге КХДР мен Қытайдың партиялық және мемлекеттік басшылығының жоғары лауазымды өкілдері, соның ішінде сыртқы саясат пен қорғаныс саласына жауапты тұлғалар қатысты.
Ким Чен Ын Си Цзиньпиннің сапары екі ел арасындағы қарым-қатынастың жоғары деңгейін көрсететінін және дәстүрлі достық пен ынтымақтастықты дамытуға деген ұмтылысты растайтынын айтты. Ол сондай-ақ Пхеньянның Бейжіңмен өзара іс-қимылды нығайтып, «Бір Қытай» қағидатын қолдауды жалғастыратынын мәлімдеді.
Өз кезегінде Си Цзиньпин КХДР-дың елді дамыту жолындағы жетістіктерін атап өтіп, Қытайдың халық республикасымен дәстүрлі байланыстарды нығайту бағыты өзгермейтінін жеткізді. Оның айтуынша, Бейжің екіжақты ынтымақтастықты дамыту мен өзара мүддеге сай негізгі мәселелер бойынша үйлестіруді жалғастыра береді.
Келіссөздер барысында халықаралық және өңірлік мәселелер талқыланып, стратегиялық үйлестіруді күшейту, екі мемлекеттің егемендігі, қауіпсіздігі мен даму мүдделерін қорғау, сондай-ақ күрделі халықаралық жағдайда өңірлік және жаһандық бейбітшілік пен дамуды бірлесіп қолдау мәселелері бойынша пікір алмасу өтті.
Сонымен қатар КХДР мен Қытай басшылары екі ел арасындағы Достық, ынтымақтастық және өзара көмек туралы шарттың 65 жылдығына орай салтанатты іс-шаралар өткізуді келісті.
ЦТАК келіссөздердің достық жағдайда өткенін және олардың Пхеньян мен Бейжің арасындағы стратегиялық ынтымақтастық қатынастарының дамуындағы жаңа кезеңге жол ашқанын атап өтті.