Құлыбаев, Ким, Рақышев: миллиардерлер компанияларын көшіріп жатыр
Қазақстандағы ірі кәсіпкерлер негізгі активтерін басқаруға қатысты құрылымдарын «Астана» халықаралық қаржы орталығының (АХҚО) юрисдикциясына жаппай көшіріп жатыр.
АХҚО-да бірқатар жаңа холдинг тіркелген. Атап айтқанда, Тимур және Динара Құлыбаевтар Almex Holding Limited компаниясын құрған. Ол «Алмэкс» холдингінің иесі атанды. Бұл құрылым Halyk Bank акцияларының шамамен 62%-ын бақылайды. Сонымен қатар Тимур Құлыбаев Farabi Development Limited компаниясын тіркеген.
Владимир Ким мен Эдуард Огай RBK Holding Limited және Kazakhmys Holding Limited компанияларын АХҚО-ға ауыстырған. Бұдан бөлек, олар Нұрхан және Нұржан Нұрлановтармен бірге KazChemicals Limited компаниясының қатысушылары ретінде көрсетілген. Ал Кеңес Рақышев АХҚО-да Fincraft Energy Holding, Arkhat Minerals және Altaris Holding құрылымдарын орналастырған.
Вячеслав Ким болса United Group Alatau Ltd компаниясын тіркеген. Неліктен ірі бизнес
АХҚО-ны таңдайды?
Сарапшылардың пікірінше, бұған бірнеше фактор әсер етеді. Біріншісі – ағылшын құқығының қолданылуы. АХҚО common law қағидаттары негізінде жұмыс істейді және жеке тәуелсіз соты бар. Бұл ірі мәмілелерді рәсімдеуге, акционерлер арасындағы дауларды шешуге және мұрагерлік мәселелерін реттеуге ыңғайлы. Екіншісі – салықтық жеңілдіктер. Компанияны АХҚО-да тіркеу автоматты түрде салықтан босатпайды. Дегенмен дивидендтер, акциялармен жасалатын операциялар және капитал өсіміне қатысты бірқатар жеңілдіктер қарастырылған. Үшінші себеп – деофшоризация саясаты. Ақпаратқа сәйкес, қазақстандық билік бизнеске басқару құрылымдарын елге қайтару талабын қойған. Бұған дейін көптеген ірі активтер Кипр, Нидерланд және Люксембург сияқты юрисдикциялардағы офшорлық құрылымдар арқылы басқарылып келген.