Астанада LRT осы аптада іске қосылады
Бұл туралы City Transportation Systems басқарма төрағасы Асылбек Дүйсебаев мәлімдеді.
Оның айтуынша, елорда тұрғындары мен қонақтары жаңа қоғамдық көлік жүйесін жақын күндері пайдалана бастайды.
Жаңа LRT пойыздары заманауи талаптарға сай жабдықталған. Әр вагонның ұзындығы 60 метр болады және 600-ден астам жолаушыны тасымалдауға мүмкіндік береді.
«Станциялар арасындағы күту уақыты – 5-6 минут. Жалпы ұзындығы 22 шақырым болатын бағытты шамамен 40 минутта жүріп өтуге болады. LRT жүргізушісіз қозғалады. Вагон ішінде тек операторлар болады», – деді Дүйсебаев.
Сондай-ақ пойыздардың ең жоғары жылдамдығы сағатына 80 шақырымға дейін жетеді. Ал қала ішіндегі орташа қозғалыс жылдамдығы сағатына 50–60 шақырым шамасында болады.