Қазақстан мектептерінде «Ясауитану» пәні оқытыла бастады
Ясауитану пәні Қазақстанның 36 мектебінде оқытыла бастады. Жаңа пән аясында оқушылар Қожа Ахмет Ясауидің өмір жолын, хикметтерін, философиялық және адамгершілік идеяларын меңгереді.
Сонымен қатар Қожа Ахмет Ясауи кесенесі аумағында ғылыми-реставрациялық жұмыстар жүргізу және жаңа туристік бағыттар ашу жоспарланып отыр.
Ясауитану ғылыми орталығының қызметкері Бауыржан Ботакараевтің айтуынша, мектеп зайырлы білім беру мекемесі болғандықтан, сабақ барысында ешқандай діни бағытқа артықшылық берілмейді.
«Қожа Ахмет Ясауидің ілімі объективті түрде оқытылады. Курстың негізіне қазақтың дәстүрі, ар-ождан бостандығы, намыс, қадір-қасиет және адамгершілік құндылықтары енгізілген», – деді ол.
Сондай-ақ ЮНЕСКО деңгейінде «Ясауи жылын» жариялау бастамасы да қарастырылып жатыр.