АҚШ ұшқышы Иранның «медуза-дрондарын» көргенін айтты
АҚШ-тың Иран аумағында атып түсірілген F-15 жойғыш ұшағының ұшқышы апат алдында бұрын-соңды кездеспеген ерекше дрондар тобын көргенін мәлімдеді.
Бұл туралы CNN телеарнасы америкалық барлау органдарындағы дереккөздерге сілтеме жасап хабарлады.
Басылым мәліметінше, 2026 жылдың сәуір айында Иран үстінде атып түсірілген америкалық F-15 ұшағының пилоты құтқарылғаннан кейін арнайы қызметтерге жауап берген. Оның айтуынша, аспанда біртұтас ағза секілді қозғалған көптеген дронды байқаған.
«Бір-бірімен байланысқан бірнеше дрон қозғалып бара жатты. Ірі дрондардың астында аяқтары сияқты көрінетін шағын аппараттар болды. Тура ғылыми-фантастикалық фильмдегідей көрінді», – деп жеткізген оның сөзін CNN дереккөздері.
Ұшқыш бұл көріністі «аспандағы дрондардың миналық алаңы» деп сипаттаған. Америкалық барлау қызметі әзірге бұл мәліметтерді толық растамағанымен, оқиға Иранның дрондар технологиясына қатысты алаңдаушылық туғызған.
CNN мәліметінше, F-15 ұшағының нақты қалай атып түсірілгені әлі анықталмаған. Алайда алдын ала бағалаулар бойынша, ерекше дрондар тобы ұшақты жою операциясында белгілі бір рөл атқаруы мүмкін.
Сонымен қатар, барлау органдарында ұшқыштың көргенін бағалауға қатысты пікірталас бар. Өйткені ол катапульталанған кезде контузия алған. Сондықтан оның сипаттаған көрінісі нақты технология ма, әлде жарақаттан кейінгі қабылдау ерекшелігі ме деген сұрақ әзірге ашық қалып отыр.
Әскери сарапшылардың пікірінше, егер бұл мәліметтер расталса, Иран дрондар тобын бір орталықтан басқаратын жаңа буындағы технологияны меңгерген болуы мүмкін. Мұндай жүйелер қазіргі соғыстарда маңызды рөл атқарып келеді.
Еске салайық, сәуір айында Иран аумағында АҚШ-тың F-15E Strike Eagle жойғышы атып түсірілген болатын. Ұшқыш бірнеше сағаттан кейін құтқарылса, қару жүйелері офицері таулы аймақта 36 сағаттан астам уақыт жасырынып, кейін арнайы операция барысында эвакуацияланған.