Вице-премьер Айда Балаева Гүлнәр Бәжкенованың ісі туралы пікір білдірді
Премьер-министрдің орынбасары Айда Балаева бүгін Үкімет кулуарында «Время» газетіне берген сұхбатында Orda.kz порталының бұрынғы бас редакторы әрі негізін қалаушылардың бірі Гүлнәр Бәжкеноваға қатысты алдағы сот процесіне қатысты пікірін айтты.
– Жалпы, мен де сіздер сияқты сот процесін алаңдаушылықпен күтіп жүрмін. Шынымды айтсам, ақпарат кеңістігінде Гүлнәрдің жетіспейтіні сезіледі, – деді Айда Балаева.
Балаеваның айтуынша, Бәжкенова – кәсіби әрі мықты журналист.
– Гүлнәр – өз ісінің кәсіби маманы. Ол өте қызықты сараптамалық материалдар мен тартымды эфирлер жасай алады. Ең бастысы, эфиріне тек хайп қуып, жағымсыз мәлімдемелер арқылы танылуға тырысатын, билікті орынсыз сынайтын адамдарды шақырмайды, – деді министр.
Сонымен қатар Айда Балаева құқықтық мемлекетте шешімді тек сот қабылдауы тиіс екенін атап өтті.
– Әрине, мен де алаңдаймын және барлық журналистер сияқты сот процесін бақылап отырамын. Бірақ біз құқықтық мемлекетте өмір сүріп жатырмыз. Кез келген адамға көзқарасымыз қандай болса да, заң бәріне бірдей, – деді ол.
Гүлнәр Бәжкеноваға қатысты бірнеше қылмыстық іс қозғалғаны 2025 жылдың желтоқсанында белгілі болды. Сол кезде сот оны үйқамаққа алған. Тергеу нұсқасына сәйкес, журналист көрінеу жалған ақпарат таратқан, аса ірі көлемде табыс табу мақсатында заңсыз кәсіпкерлікпен айналысқан және мүлікті жымқырған. Ал Бәжкенова өзіне тағылған айыптарды мойындамайды.
Бұл іс бойынша сот процесі 2 шілдеге белгіленген.