Қазақстанның 2027 жылға арналған бюджетінде қосымша қаржы қоры аз
Құжат бойынша келесі жылы мемлекет 30,2 трлн теңге жұмсамақ. Ал бюджет тапшылығы 4,6 трлн теңге немесе ЖІӨ-нің 2,3%-ы деңгейінде жоспарланып отыр. Бұл туралы Құрылтай төрағасының орынбасары Дәния Еспаева мәлімдеді.
Оның айтуынша, экономикалық жағдай нашарлап, жоспарланған кірістер азайса, бюджет тапшылығы 5,6–6,5 трлн теңгеге дейін өсуі мүмкін. Яғни мемлекетке қосымша шығындарды жабу қиындай түседі.
2027 жылы бюджетке түсетін өз кірістер 19,9 трлн теңге болады деп күтілуде. Бұл елдің жалпы ішкі өнімінің шамамен 10%-ына тең. Еспаева кірістердің өсімі жоғары болғанымен, оның бір бөлігі 2026 жылғы төмен көрсеткіштердің орнын толтыруға байланысты екенін атап өтті.
Мемлекеттік қарыз да бюджетке салмақ түсіріп отыр. Келесі жылы қарызды өтеу және оған қызмет көрсетуге бюджет кірістерінің 40,6%-ы жұмсалмақ. Бұл білім беру, денсаулық сақтау, инфрақұрылым және басқа да даму бағыттарына қаржы бөлу мүмкіндігін шектейді.
Сонымен қатар Жоғары аудиторлық палата бюджет шығыстарының бір бөлігіне қатысты ескерту жасаған. Кейбір жобалар бойынша қаржының не үшін қажет екені, есеп-қисабы және жобаны іске асыруға дайын екендігін растайтын құжаттар жеткіліксіз болған.
Аудиторлық палата осыған байланысты жоспарланған шығыстарды 396,3 млрд теңгеге қысқартуды ұсынды. Ал негіздемесі жеткілікті бағыттарға қосымша 46 млрд теңге бөлу ұсынылған.
Дәния Еспаеваның айтуынша, депутаттардың міндеті бюджет жобасын жай ғана сынау емес, қажетсіз шығындарды анықтап, қаржыны нақты нәтиже беретін бағыттарға жұмсау жолдарын ұсыну.