Ақорданы басып алмақ болды деп айыпталған бес белсендіге үкім шықты
Алматыда «Ақорданы басып алмақ болды» деп айыпталған бес белсендіге сот үкімі шықты.
Қайсар Өзбек пен Талғат Әшіров 5 жыл 6 айға, ал Асқар Нұрмаған, Әбдуәлі Тағай және Дүйсенбек Жақашев 5 жылға бас бостандығынан айырылды.
Бұл туралы 8 қыркүйекте құқық қорғаушы Бақытжан Төреғожина мәлімдеді. Алматы қаласы Алмалы аудандық қылмыстық сотының судьясы бес белсендіге айыптау үкімін шығарған.
Асқар Нұрмаған, Әбдуәлі Тағай және Дүйсенбек Жақашевке «адамдар тобының билікті күшпен басып алуын немесе ұстап тұруын насихаттау», сондай-ақ күш қолдану, қирату және билік өкілдеріне қарсылық көрсетумен ұласатын жаппай тәртіпсіздіктерді ұйымдастыруға дайындалу айыптары тағылған.
Қайсар Өзбек пен Талғат Әшіровке бұған қоса жарылғыш заттарды топ болып заңсыз сатып алу, сақтау және тасымалдау бойынша айып тағылды. Сондықтан оларға тағайындалған жаза қалған үшеуінен алты айға ұзақ болды.
Тергеу нұсқасына сәйкес, белсенділер 2025 жылғы қаңтар-маусым аралығында бірнеше рет кездесіп, WhatsApp-та «Қайрат Команда» атты ортақ чат құрған. Айыптау актісінде олар Астанада жаппай тәртіпсіздік ұйымдастырып, президент резиденциясы – Ақорданы басып алу және халықты көтеру жоспарын талқылады деп көрсетілген.
Бес белсенді 2025 жылғы маусымда ұсталып, содан бері қамауда болған. Іс жабық режимде қаралды. Сот процесі басталғанда прокурор куәгерлердің бірінің қауіпсіздігіне алаңдайтынын алға тартып, отырыстарды жабық өткізуді сұраған. Сот бұл өтінішті қанағаттандырды.
Бұған дейін, 4 қыркүйекте, мемлекеттік айыптаушы бес белсендінің әрқайсысын 8 жылға бас бостандығынан айыруды сұраған еді. Қорғаушылар тағылған айыптарды негізсіз деп санайтынын мәлімдеген.
Осылайша, сот прокурор сұраған сегіз жылдан жеңілірек жаза тағайындады: үш белсенді 5 жылға, тағы екеуі 5 жыл 6 айға сотталды.