АҚШ пен Иран келіссөздерінің екінші кезеңі өтуі мүмкін
АҚШ вице-президенті Джей Ди Вэнс Иранмен ықтимал бітім келіссөздерін жалғастыру үшін Исламабад қаласына аттануы мүмкін.
Бұл туралы америкалық дереккөздерге сүйенген Axios хабарлады.
Ақ үй дүйсенбі бойы Тегеран тарапынан ресми жауап күткен. Алайда Иран әзірге келіссөздердің екінші кезеңіне қатысатынын нақты растаған жоқ.
Басылымның жазуынша, келіссөздердің кешеуілдеуіне Ислам революциясы сақшылар корпусы тарапынан қысым себеп болуы мүмкін. Олар қатаң ұстанымды қолдайды: Ормуз бұғазы бойынша АҚШ шектеулері алынбайынша, келіссөз жүргізбеу.
Axios мәліметінше, ирандық делегация жоғарғы діни көшбасшы Моджтаба Хаменеи тарапынан рұқсат күткен. Бұл рұқсат дүйсенбі кешке берілген. Ал Reuters агенттігінің дерегі бойынша, Иран келіссөзге қатысу мүмкіндігін қарастырып жатыр, бірақ нақты шешім әлі қабылданбаған.
Пәкістандық дереккөздердің айтуынша, атысты тоқтату режимі сейсенбі күні (АҚШ уақытымен 20:00-де) аяқталуы тиіс. Алайда АҚШ президенті Дональд Трамп бұл мерзімді іс жүзінде сәрсенбі кешіне дейін ұзартқан.
Алдын ала жоспар бойынша, келіссөздерге Джей Ди Вэнс, Стив Уиткофф, Джаред Кушнер қатысады.