Алаяқтар қазақстандықтарға 150 мыңға жуық жалған SMS жолдаған
Астанада қазақстандықтардың банк шоттарына қол жеткізуге әрекет жасаған алаяқтық топтың жолы кесілді. Қаржылық мониторинг агенттігінің мәліметінше, күдіктілер небәрі төрт күн ішінде шамамен 150 мың фишингтік SMS таратқан.
Тергеу дерегіне сәйкес, схеманы Оңтүстік-Шығыс Азия елдерінің бірінің азаматы ұйымдастырған. Ол қаңтар айында жергілікті тұрғындардың бірін ақшаға тартып, кейін топқа басқа адамдар да қосылған.
Қылмыстық топ SMS тарату үшін арнайы құрылғы – SMS-бластер қолданған. Ол ұялы байланыс базалық станциясының жұмысын имитациялап, байланыс операторларының қорғаныс жүйелерін айналып өтуге мүмкіндік берген.
Жалған хабарламалар Beeline, Kcell және Activ абоненттеріне жолданған. Алаяқтар SMS-те танымал компаниялардың атын пайдаланып, жиналған бонустарды айырбастау туралы ұсыныс жасаған.
Хабарламадағы сілтеме пайдаланушыларды жалған сайтқа бағыттаған. Онда азаматтардан банк картасының деректері, CVV-код және SMS арқылы келген растау кодын енгізу сұралған. Осылайша қаскөйлердің жәбірленушілердің жеке мәліметтері мен қаражатына қол жеткізу мүмкіндігі болған.
Операция барысында күдіктілер пайдаланған арнайы жабдық тәркіленді. Қылмыстық іске қатысы бар деген төрт адам қамауға алынды.
Тергеу жалғасып жатыр.