Әлемде мұнай тапшылығы бір миллиард баррельге жетті
Saudi Aramco компаниясының есептеулері бойынша, АҚШ пен Израильдің Иранмен соғысы және Ормуз бұғазының блокадасы салдарынан әлемдік мұнай нарығында шамамен 1 миллиард баррель мұнай тапшылығы туындады.
Бұл туралы 10 мамыр күні Reuters агенттігі хабарлады.
Saudi Aramco басшысы Амин Насердің айтуынша, тіпті Ормуз бұғазы қайта ашылып, мұнай жеткізу қалпына келген күннің өзінде, нарық пен бағаны тұрақтандыру үшін біраз уақыт қажет болады.
Оның сөзінше, АҚШ пен Израильдің Иранмен соғысына қоса, мұнай саласына жылдар бойы жеткілікті инвестиция құйылмауы да нарықтағы қысымды күшейткен. Бұл қазірдің өзінде төмен деңгейге түсіп кеткен әлемдік мұнай қорларына ауыр әсер етуде.
Reuters-тің жазуынша, әлемдегі ең ірі мұнай компанияларының бірі Saudi Aramco-ның 2026 жылдың бірінші тоқсанындағы таза пайдасы 25 пайызға артып, 32,5 миллиард долларға жетті. Компания үлесіне әлемдік мұнай қорларының шамамен 12 пайызы тиесілі.
Амин Насер компанияның Ормуз бұғазындағы блокаданы айналып өту үшін өз мұнай құбырын пайдаланып жатқанын айтты.
Бұл құбыр Парсы шығанағының шығыс жағалауынан Қызыл теңізге дейін күніне 7 миллион баррельге дейін шикі мұнай тасымалдау мүмкіндігіне ие.
Мұнай қорларының рекордты деңгейде азаюы
Бұған дейін Financial Times басылымы S&P Global Energy және Goldman Sachs сарапшыларының мәліметтеріне сілтеме жасап, 2026 жылдың сәуір айының қорытындысы бойынша әлемдік мұнай қорлары рекордтық деңгейде — 200 миллион баррельге азайғанын хабарлаған еді.
S&P есептеулеріне сәйкес:
- Сәуір айында мұнай көлемі күніне 6,6 миллион баррельге қысқарған.
Мұнайға деген сұраныс күніне 5 миллион баррельге дейін төмендеген. Бұл — бақылау тарихындағы (коронавирус пандемиясынан кейінгі) екінші ең үлкен құлдырау.
Мамандардың пікірінше, нарық мұнай қорларының рекордты жылдамдықпен қысқаруына әлі толық реакция білдірген жоқ. Сондықтан мұнай бағасының негізгі өсімі алдағы уақытта болуы мүмкін.
Financial Times мәліметі бойынша, қазір дүние жүзінде өндірілген, бірақ әлі өңделмеген жалпы шикі мұнай қоры шамамен 4 миллиард баррельді құрайды. Алайда, бұл көлемнің басым бөлігі мұнай өңдеу зауыттары мен құбыр жүйелерінің күнделікті жұмысын қамтамасыз ету үшін тұрақты түрде пайдаланылады.