Алматы мен Алматы облысындағы авто-мектеп басшылары Тоқаевқа үндеу жасады
Алматы қаласы мен Алматы облысындағы авто-мектептердің басшылары президент Қасым-Жомарт Тоқаевқа бейнеүндеу жолдады.
Олар кейбір оқу орталықтары іс жүзінде оқудан өтпеген адамдарға жүргізуші курсын аяқтағаны туралы куәлік беріп отырған болуы мүмкін деп мәлімдеді.
Үндеу авторларының айтуынша, бұған дейін бұл мәселе бойынша Ішкі істер министрлігіне, Үкіметке және прокуратураға шағымданғанымен, мәселе шешілмеген.
Негізгі шағымдардың бірі – ресми оқу топтарын есепке алатын «Автомектеп» автоматтандырылған ақпараттық жүйесіне қатысты. Авто-мектеп өкілдері жүйе нақты оқудан өтпеген адамдарға куәлік рәсімдеуге мүмкіндік бермеуі тиіс деп есептейді.
Мысал ретінде олар бір ұйымды келтіреді. Үндеу авторларының сөзінше, оның қарамағында 500-ден астам оқу орны бар және бір жылда 15 мыңнан астам курсант оқытады. Авто-мектеп өкілдері мұндай көрсеткіштердің шынайылығына күмән келтіреді.
Ал Ішкі істер министрлігінің ұстанымы өзгеше. Ведомство цифрлық есеп жүйесі керісінше заң бұзушылықтарды анықтауға және толық оқу курсынан өтпеген адамдарды емтиханға жібермеуге мүмкіндік беретінін мәлімдеген.
2027 жылдан бастап талап өзгереді
Авто-мектеп өкілдерін алдағы заңнамалық өзгерістер де алаңдатып отыр. 2027 жылғы 1 қаңтардан бастап авто-мектептер үшін хабарлама тәртібінің орнына рұқсат беру тәртібі енгізіледі. Яғни бұдан былай авто-мектеп ашылғаны туралы мемлекетке жай ғана хабарлау жеткіліксіз болады.
Осы өзгерістерден кейін ІІМ оқу орталықтарын бақылауға көбірек мүмкіндік алады. Тиісті түзетулер «Жол жүрісі туралы» заңға енгізілген.
Үндеу авторлары оқу базасына, соның ішінде жаттығу алаңдарына қойылатын талаптар шағын авто-мектептер үшін тым қымбатқа түсуі мүмкін деп қауіптенеді. Соның салдарынан олардың бір бөлігі нарықтан кетуі ықтимал.
Дегенмен 2027 жылдан бастап әр авто-мектеп міндетті түрде жеке автодром салуға тиіс деп айту дұрыс емес. Нормативтік құжаттарда дәл осындай талап жоқ. Алайда оқу жүргізілетін алаңдарға қатысты белгілі бір талаптар қарастырылған.
Үндеу авторлары көтерген тағы бір мәселе – жүргізуші емтихандарын қабылдау мен жүргізуші куәлігін беру құзыретін жеке ұйымдарға бермеу. Қазіргі уақытта жүргізуші куәліктерін ІІМ жүйесі арнайы ХҚКО арқылы береді.