Алматыда «Әбіл» фильмінің жабық премьерасы өтеді
Алматыда 22 маусым күні режиссер Елзат Ескендірдің «Әбіл» толықметражды көркем фильмінің жабық премьерасы өтеді.
Ұйымдастырушылардың хабарлауынша, көрсетілім Алматы қаласындағы «Арман» кинотеатрының Синема залында (Достық даңғылы, 104) өтеді. Қонақтарды қарсы алу сағат 18:30-да басталса, фильм көрсетілімі 19:30-ға жоспарланған.
ОҚИ ОТЫРЫҢЫЗ: ЕЛЗАТ ЕСКЕНДІР, РЕЖИССЕР: АДАМНЫҢ ҚАҚЫ МЕН ҚҰҚЫН ОЙЛАЙ АЛМАСАҚ, АЗАМАТТЫҚ ҚОҒАМ ОРНАТАМЫЗ ДЕГЕНІМІЗ ӨТІРІК
Фильм не жайлы?
"Әбіл" фильмі Совет Одағы құлап, колхоз-совхоз тарап, мал-мүлік бөліске түсіп, елде приватизация орын алған кезеңдегі қиянатқа ұшыраған қарапайым адамдар мен қараусыз қалған қазақ ауылындағы бейберекетсіздікті суреттейді. Сол арқылы кинотуынды тәуелсіздік басындағы күрделі уақыт ағымындағы қазақ халқының рухани кейпіне, психологиялық күйіне әлеуметтік талдау жасауды ұсынады. Фильмде советтік жүйе кезіндегі адам өмірінің құнсыздығы, қазақ халқының тұрмыс-тіршілігінің ерекшелігі мен өз жерінде, өз елінде кемсітушілікке ұшырағандығы, социализнен капитализмге ауысу кезеңіндегі екіұдай сезім, сонымен қатар, жемқорлықтың пайда болуы жайлы да ой қозғайды. Фильм үлкен тарихи оқиғалар кезіндегі кішкентай адамдардың тағдырын суреттеуді негіз еткен.
Фильмнің әлемдік тұсаукесері 2024 жылы өткен Busan International Film Festival аясында өткен. Кейін картина Азия мен Еуропадағы оннан астам халықаралық кинофестивальде көрсетіліп, он жүлде иеленген.
Фильм алған марапаттар:
Vesoul International Film Festival of Asian Cinemas (Франция) – Қазылар алқасының бас жүлдесі, сыншылар алқасының жүлдесі және NETPAC сыйлығы;
Bishkek International Film Festival – «Үздік актер» жүлдесі;
Da Nang Asian Film Festival – «Үздік әйел рөлі» жүлдесі;
Silk Road International Film Festival – «Үздік ер адам рөлі» жүлдесі;
Dhaka International Film Festival – «Үздік ер адам рөлі» және «Үздік операторлық жұмыс» жүлделері;
UniverCine Nantes Film Festival (Франция) – Қазылар алқасының жүлдесі және көрермендер көзайымы сыйлығы.
Шығармашылық топ
Фильмнің сценарий авторы әрі режиссері – Елзат Ескендір.
Продюсерлері – Серік Әбішев, Сергей Азимов және Ерлан Бекқожин.
Халықаралық продюсер – Юлия Ким.
Қоюшы оператор – Йоланта-Анна Дылевска.
Композитор – Ақмарал Мерген.
Дыбыс режиссері – Илья Гариев.
Басты рөлдерде:
Әбіл – Ерлан Төлеутай;
Шынар – Нұржан Бексұлтанова;
Меңтай – Қайсар Депутат;
Майра – Інжу Әбдібек;
Көкіш – Нұртас Бақыт;
Омыш – Мирас Бүркітжан.
Фильмдегі басты кейіпкер Әбілдің рөлін дәстүрлі музыка орындаушысы, композитор, публицист және өнертанушы Ерлан Төлеутай сомдаған. Оның актерлік жұмысы халықаралық кәсіби ортада жоғары бағаланып, бірнеше рет «Үздік актер» аталымы бойынша марапатталған.
Алматыдағы көрсетілім фильмнің халықаралық фестивальдердегі сапарынан кейінгі Қазақстандағы алғашқы ірі таныстырылымы болмақ.
«Әбіл» фильмі Ұлттық киноны қолдау мемлекеттік орталығының қолдауымен және Қазақфильм қатысуымен түсірілген.
Фильмнің ресми дистрибьюторы – Tanaris Production. Қазақстандағы прокатты Sulpak Cinema жүзеге асырады.