«Кабиналарда жолаушылар отырған»: Алматыда Көктөбеге қатынайтын аспалы жол тоқтап қалды
Алматыдағы Көктөбеге қатынайтын аспалы жол 17 шілде күні кенет тоқтап қалды. Сол сәтте кабиналардың ішінде жолаушылар болған.
Алдын ала мәлімет бойынша, оқыс жағдайға электр энергиясының апатты түрде өшуі себеп болған. «Көктөбе» саябағы әкімшілігінің хабарлауынша, фуникулерлердің жұмысы дәл осы электр желісіндегі ақауға байланысты уақытша тоқтаған.
«Алатау Жарық Компаниясы» АҚ мәліметіне сәйкес, сағат 14:45-те электрмен жабдықтау толық қалпына келтірілген. Осыдан кейін кабиналардағы барлық жолаушы қауіпсіз түрде эвакуацияланды.
Қала әкімдігінің хабарлауынша, қазіргі уақытта аспалы жол жолаушыларды қабылдамайды. Мамандар барлық техникалық тексеруді аяқтап, қауіпсіздігі толық расталғаннан кейін ғана оның жұмысы қайта жанданады.
Оқиғаның мән-жайын анықтау мақсатында жолаушылар тасымалдайтын аспалы жолдың қызметі уақытша тоқтатылды.