Асқарбек Ертаев Еңбек және халықты әлеуметтік қорғау министрі болып тағайындалды
Асқарбек Ертаев Қазақстан Республикасының Еңбек және халықты әлеуметтік қорғау министрі болып тағайындалды.
Бұған дейін министр лауазымын атқарған Светлана Жақыпова сол күні Президент Жарлығымен қызметінен босатылды.
Асқарбек Ертаев 1977 жылы Ақтөбе қаласында дүниеге келген. Ол Жұбанов атындағы Ақтөбе мемлекеттік университетін, сондай-ақ «НҰР» Ақтөбе менеджмент, бизнес және құқық институтын тәмамдаған.
Еңбек жолын 1997 жылы Ақтөбе облысы Мұғалжар ауданы әкімінің аппаратында маман ретінде бастаған. 2000-2014 жылдары банк секторында жұмыс істеді.
2014 жылы Экономика және бюджеттік жоспарлау министрлігінің Сауда комитетінде бас сарапшы міндетін атқарды. 2014-2021 жылдары Ұлттық экономика министрлігінде түрлі лауазымдарда қызмет етіп, басқарма басшысы, департамент директорының орынбасары, департамент директоры болды.
2021-2022 жылдары Президент Әкімшілігінің Қауіпсіздік кеңесінде талдау бөлімінің меңгерушісі қызметін атқарды. 2022-2023 жылдары Премьер-министр кеңсесінің, Үкімет аппаратының экономикалық бөлімін басқарды.
2024 жылдың тамыз айында Асқарбек Ертаев Еңбек және халықты әлеуметтік қорғау министрінің бірінші орынбасары болып тағайындалған еді.