Axios: Трамп Зеленскийдің Ресей мұнай өңдеу зауыттарына жасаған шабуылына ашулы
Трамп Зеленскийге Ресейдің мұнай өңдеу зауыттарына жасалған шабуылдарға байланысты ашуланған.
Бұл туралы Axios басылымы Ақ үйдегі дереккөзіне сілтеме жасап хабарлады.
Басылымның мәліметінше, Трамп Украина тарапынан Ресейдің мұнай өңдеу зауыттарына жасалып жатқан шабуылдарға наразы. АҚШ президенті Киевтен мұндай соққыларды тоқтатуды бірнеше рет сұраған.
Ақ үйдегі аты-жөні жарияланбаған шенеуніктің айтуынша, Трамп Зеленскийдің ұстанымына қатты ашуланған.
"Трамп қатты ашулы. Ол Зеленский АҚШ-тың көмегін өзінен-өзі берілуге тиіс нәрсе деп қабылдайды деп есептейді", – деген дереккөз Axios басылымына.
Вашингтон Ресейдің мұнай өңдеу кәсіпорындарына жасалған шабуылдар әлемдік энергетика нарығына әсер етіп, АҚШ-та жанармай бағасының өсуіне ықпал етуі мүмкін деп алаңдайды.
Ал Зеленский Ресей Украинадағы электр станциялары мен басқа да энергетикалық инфрақұрылым нысандарына шабуыл жасауды тоқтатқан жағдайда, Украина да Ресейдің мұнай өңдеу зауыттарына соққы беруден бас тартуға дайын екенін мәлімдеген.
Бұған дейін Дональд Трамп Ресей мен Украина энергетикалық нысандарға шабуыл жасамау туралы келісімге келгенін хабарлаған болатын. Оның айтуынша, "энергетикалық бітім" дереу күшіне енуі тиіс.
Алайда Киев үшін бұл мәлімдеме күтпеген жаңалық болған. Зеленский келісімнің нақты қашан күшіне енетінін түсіндіруді сұраған.
Axios дерегінше, Ресей тарапы энергетикалық бітімге ресми түрде келісім бергенін әзірге растаған жоқ.
Сонымен қатар Financial Times басылымының мәліметіне сүйенген Reuters АҚШ Украина Ресейдің мұнай өңдеу зауыттарына шабуылын жалғастырған жағдайда, қару-жарақ жеткізу тетіктерін шектеуі мүмкін екенін хабарлаған. Дегенмен бұл ақпарат ресми түрде расталмаған.
Айта кетейік, Трамп бұған дейін де Ресей мен Украина энергетикалық нысандарға шабуыл жасамауға келіскенін мәлімдеген. Алайда сол келісім туралы хабардан кейін де тараптардың өзара соққылары жалғасқан.