Бишімбаев: Мен тағылған айыпты мойындамаймын
Бүгін елорданың қылмыстық істер жөніндегі мамандандырылған ауданаралық сотында алқабилердің қатысуымен Бишімбаевқа қатысты сот отырысы өтті.
Әйелі Салтанат Нүкенованы азаптап өлтірді деп айыпталған бұрынғы Ұлттық экономика министрі Қуандық Бишімбаев кінәсін тағы да мойындамады.
Құрметті сот, мен сотқа дейінгі тергеп-тексеру кезінде де, еш жерде өз оқиғамды айтуға мүмкіндігім болмағанын айтқым келеді. Қазір прокурорлар оқығандардың бәрі ойдан шығарылған, нақты айғақ болып табылмайды. Сондықтан мен тағы да айтамын: 110-бап бойынша мұндай қылмыс менің тарапымнан ешқашан жасалған емес, мен оны мойындамаймын. Мен "адамды ерекше қатыгездікпен қасақана өлтірген жоқпын. Мен өз ұстанымымды білдіруге мүмкіндігім болады деп үміттенемін - деді Бишімбаев.
Ал, прокурор Бишімбаевтың Нүкеноваға үнемі физикалық зорлық -зомбылық көрсетіп келгенін мәлімдеді.
Бишімбаев физикалық артықшылығын пайдалана отырып, Нүкеноваға жүйелі түрде қатыгездікпен ар-намысына тиісіп физикалық зорлық-зомбылықты қолдана бастаған. Атап айтқанда оның денесіне жұдырықпен және аяқпен дене жарақатын салған. Осылайша жүйелі түрде оған физикалық зорлық көрсеткен", - деді мемлекеттік айыптаушы.
Айта кетейік, Бишімбаевтың ісі бойынша судья Айжан Құлбаева. Ол бұған дейін Мәжілістің бұрынғы депутаты Нұржан Әлтаевқа, журналист Махамбет Әбжанға қатысты істер және «Астана ЭКСПО-2017» ұлттық компаниясының сотталған бұрынғы басшысы Талғат Ермегияевтің істерін қараған.
Фото: Астана сотының баспасөз қызметі