Болат Назарбаевқа тиесілі Қордайдағы 34 гектар базардың жері мемлекетке қайтарылды
Болат Назарбаевтың 2004 жылы Қордай ауданынан алған 34 гектар жері мемлекетке қайтарылды, деп хабарлайды Zhasalash.kz.
Прокуратураның 20 жылдан кейін таратқан ақпараты бойынша, Болат Назарбаевқа жер Қордай әкімдігінің және Қордай ауылдық округі әкімінің шешімімен берілген. Ол 34,3017 га жерді өзінің «Қарасай БН-Тараз» ЖШС қарасты «Барыс-2» сауда кешеніне қызмет көрсету үшін алған.
Алайда учаскені беру кезінде оның тәртібі бұзылған. Сондай-ақ ерекше қорғалуға жататын ауданы 22,25 гектар суармалы егістік жерлердің бір бөлігі базардың қармағына өткен.
«Осыған байланысты аудан прокуратурасы аудан және ауылдық округ әкімдіктерінің актілерін, сатып алу-сату шарттарын жарамсыз деп тану және күшін жою туралы сотқа талап қойды. Жамбыл облыстық сотының азаматтық істер жөніндегі сот алқасының 2023 жылғы 28 желтоқсандағы қаулысымен «Қарасай БН-Тараз» ЖШС-мен Қордай ауданы әкімдігінің Жер қатынастары бөлімі арасындағы 24.07.2007 жылғы №81 және №82 жер учаскелерін сатып алу-сату, жер учаскелерін өтеусіз беру туралы «Қордай Инвест» ЖШС-ның барлық шарттары жарамсыз деп танылып, күштері жойылды», - делінген хабарламада.