Бірлік, тәртіп һәм қауіпсіздік

Өйткені қоғамдық келісім орныққан жерде азаматтардың қауіпсіздігі қамтамасыз етіліп, мемлекеттік институттар мен қоғам арасындағы өзара сенім нығаяды. Ал тұрақтылықты сақтау жергілікті атқарушы биліктен бастап бұқаралық ақпарат құралдарына, қоғамдық ұйымдарға және әр азаматқа дейін ортақ жауапкершілікті талап ететін үдеріс. Осы тұрғыдан алғанда қоғамдық-саяси ахуалды тұрақты бақылауда ұстап, ықтимал тәуекелдердің алдын алу – әлеуметтік тыныштықты сақтаудың маңызды тетігі. Түркістан облысы әкімдігінің мәжіліс залында өткен қоғамдық-саяси ахуал жөніндегі штаб отырысында да осы мәселелер кеңінен қаралды. 

Жиын облыс әкімінің орынбасары Е.Алтаевтың төрағалығымен өтіп, оған облыстық полиция департаменті бастығының орынбасары, аудан және қала әкімдерінің орынбасарлары, облыстық басқармалардың басшылары мен тиісті бағыттарға жауапты мамандар қатысты. Басқосуда өңірдегі қоғамдық-саяси тұрақтылықты қамтамасыз етуге қатысты қазіргі ахуал сараланып, азаматтардың қауіпсіздігіне әсер етуі мүмкін факторлардың алдын алу мәселелері ортаға салынды. Мұндай жиындардың маңызы әсіресе әлеуметтік процестер жылдам өзгеріп жатқан қазіргі кезеңде арта түседі. Қоғамдық көңіл күйге экономикалық жағдай, әлеуметтік мәселелер, ақпараттық кеңістіктегі өзгерістер, әлеуметтік желілердегі пікірталастар, жергілікті деңгейдегі түйткілдер ғана емес, қоғамдық орындардағы кез келген оқиға әсер етуі мүмкін. Сондықтан тұрақтылықты тек «дау туындамаған жағдай» деп қабылдау жеткіліксіз. Оның маңызды өлшемі – мәселе ушығып кетпей тұрып, себептерін байқап, тиісті шараларды уақытылы қабылдау. Осы ретте жиында бұқаралық ақпарат құралдарымен өзара іс-қимыл тәртібіне ерекше назар аударылуы да заңды.

«Қазіргі медиакеңістікте ақпараттың таралу жылдамдығы оқиғаның өзінен бірнеше есе жоғары болуы мүмкін. Бір оқиға туралы толық әрі нақты мәлімет берілмеген жағдайда әлеуметтік желілерде түрлі болжам, қауесет пен эмоциялық пікірлер тарап, қоғамдық пікірдің қалыптасуына ықпал етеді. Сондықтан мемлекеттік органдардың журналистермен жедел, ашық әрі түсінікті коммуникация орнатуы қоғамдық тұрақтылықтың ақпараттық құрамдас бөлігіне айналып отыр. Сарапшылардың пайымынша, дағдарыс жағдайындағы коммуникацияның басты қағидасы – ақпаратты жасыруға емес, қоғамда пайда болған сұрақтарға уақытылы әрі дәлелді жауап беруге негізделуі. Өйткені ақпараттық вакуум пайда болған жерде оны көбіне расталмаған мәліметтер толтырады. Бұл тұрғыда журналистермен жүйелі байланыс орнату мемлекеттік органдардың ақпарат тарату міндетін ғана емес, қоғамның сенім деңгейін сақтаудың бір жолын да білдіреді», – дейді облыс әкімінің орынбасары.

Штаб отырысында футбол матчтары кезінде қоғамдық тәртіп пен қауіпсіздікті қамтамасыз ету мәселесінің қаралуы да осы кешенді тәсілдің бір бөлігі. Спорттық жарыстар бейбіт бәсекелестік пен ортақ эмоция қалыптастыратын қоғамдық орта болғанымен, көрермендердің көп шоғырлануы қауіпсіздікке қосымша талаптар қояды. Әсіресе жанкүйерлер арасындағы эмоциялық шиеленіс, стадионға кіру және шығу кезіндегі адам көптігі, көлік қозғалысы, қоғамдық орындардағы тәртіп секілді факторлар алдын ала ескеруді қажет етеді. Сондықтан мұндай іс-шаралар кезінде қауіпсіздік шараларын күшейту тек құқық бұзушылық болғаннан кейін әрекет етуге емес, оның алдын алуға бағытталуы тиіс. Әлемдік тәжірибеде бұқаралық спорттық іс-шаралардың қауіпсіздігі стадион ішіндегі тәртіппен ғана шектелмей, көрермендердің нысанға келуінен бастап, үйлеріне қайтуына дейінгі кезеңді қамтитын кешенді жүйе ретінде қарастырылады. Яғни қауіпсіздікке жауапты құрылымдар, ұйымдастырушылар, медицина қызметкерлері, көлік және коммуналдық қызметтер арасында алдын ала үйлесім болуы маңызды. Түркістан облысындағы штаб отырысында осы бағыттарға жауапты мекемелерге нақты тапсырмалардың берілуі де профилактикалық жұмыстың жүйелі жүргізілуіне мүмкіндік бермек.

Жиын қорытындысында қоғамдық-саяси тұрақтылықты сақтау, құқық бұзушылықтардың алдын алу және өңірдегі қауіпсіздік шараларын күшейту жөнінде жауапты органдарға тиісті міндеттер жүктелді. Мұндағы негізгі мақсат – туындаған мәселелердің ықтимал тәуекелдерді ертерек анықтап, олардың қоғамға әсерін барынша азайту. Түркістан облысы секілді халқы тығыз орналасқан, қоғамдық өмірі белсенді өңірлерде бұл міндеттердің маңызы одан сайын жоғары. Қоғамдық келісім мен қауіпсіздікті сақтау бір ғана мекеменің жұмысы ретінде қаралмай, тұтас өңірлік басқару мәдениетінің көрсеткішіне айналғаны жөн.

С.Бақберген