CBS News: АҚШ пен Израиль Иранның энергетикалық нысандарына соққы жасауға дайындалып жатыр

 Бұл туралы бірнеше дереккөзге сілтеме жасаған CBS News хабарлады.

Дереккөздердің мәліметінше, соққылар демалыс күндері жасалуы мүмкін. Сонымен қатар қаржы нарықтарына ықтимал әсеріне байланысты операцияны дүйсенбі күні нарықтар ашылғанға дейін аяқтау нұсқасы қарастырылғанымен, нақты шешім әлі қабылданбаған.

АҚШ-тағы бірнеше дереккөздің айтуынша, Израиль жоспардан хабардар және Вашингтонмен әрекетін үйлестіріп отыр. Алайда президент Дональд Трамп әзірге операцияны бастауға түпкілікті рұқсат бермеген.

Израильдік шенеунік CBS News арнасына Израильге әскери іс-қимылды қайта бастау туралы шешім қабылданғаны белгісіз екенін және мұндай операцияға қатысу туралы өтініш түспегенін айтқан.

Кейін ақпарат көздері ықтимал әскери операция жұма күні Кэмп-Дэвидте өткен президент Трамптың кабинет отырысында талқыланғанын хабарлады. Олардың айтуынша, Ақ үйдің кейбір саяси кеңесшілері бұл жоспарға үзілді-кесілді қарсы болған.

Журналистердің сұрақтарына жауап берген Трамп:

 «Біз оларға өте ауыр соққылар жасаймыз. Сол кезде олар біз бұған енді шыдай алмаймыз дейді», – деген.

Ал дипломатияның қайта жандануы туралы сұраққа:

 «Біздің мақсатымыз – жеңіске жету», – деп жауап берген.

Екі дереккөздің мәліметінше, негізгі нысандар ретінде электр станциялары мен мұнай өңдеу зауыттары қарастырылып отыр.

Ақ үйдің баспасөз хатшысы Каролин Левитт CBS News-ке берген мәлімдемесінде:

 «Президент Трамп бүгінгі кабинет отырысында айтқандай, АҚШ жеңіске жетеді және оның президенттігі кезінде Иран ядролық қаруға ие болмайды», – деді.

Пентагонның баспасөз хатшысы Шон Парнелл президент түпкілікті шешім қабылдағанға дейін ықтимал нысандар туралы пікір білдірмейтінін айтты.

Оның сөзінше, АҚШ Қорғаныс министрлігі президенттің кез келген бұйрығын орындауға дайын.

CBS News сөйлескен бұрынғы америкалық әскери шенеуніктің пікірінше, энергетикалық инфрақұрылымға жасалған соққылар Иран армиясының мүмкіндіктеріне және мемлекеттік басқару жүйесіне елеулі әсер етуі мүмкін.

Сондай-ақ жоғары лауазымды израильдік шенеуніктің айтуынша, премьер-министр Биньямин Нетаньяху осы аптада бірнеше әскери іс-қимыл нұсқасын, соның ішінде құрлықтағы жабдықтау бағыттарына соққы жасауды талқылаған.

Бұған дейін Дональд Трамп Truth Social желісінде Ормуз бұғазында кез келген кеме шабуылына жауап ретінде Иранның көпірлері немесе электр станциялары бомбаланатынын мәлімдеген.