ДДСҰ Эбола індетіне байланысты халықаралық деңгейдегі төтенше жағдай режимін жариялады
Дүниежүзілік денсаулық сақтау ұйымы (ДДСҰ) Конго Демократиялық Республикасы мен Угандада таралып жатқан Эбола індетіне байланысты халықаралық маңызы бар төтенше жағдай режимін жариялады.
Ұйым мәліметінше, Бундибугйо вирусынан туындаған Эбола безгегі халық денсаулығына елеулі қауіп төндіріп отыр. Алайда әзірге жағдай пандемия деңгейіндегі төтенше ахуал критерийлеріне сәйкес келмейді.
ДДСҰ қазіргі уақытта ауру жұқтырғандардың нақты саны мен індеттің географиялық таралу ауқымы бойынша белгісіздік жоғары екенін атап өтті.
Алдын ала деректерге сәйкес, Конгоның үш аймағында Эболамен байланысты болуы мүмкін 80 өлім тіркелген. Сондай-ақ 246 күдікті жағдай анықталып, оның сегізі зертханалық жолмен расталған.
Уганда астанасы Кампалада да Конгодан келген адамдар арасында вирус жұқтырудың екі зертханалық расталған жағдайы тіркелді. Оның бірі өліммен аяқталған. Конгоның Денсаулық сақтау министрі Самуэль Роже Камба 15 мамыр күні елде Эболаның жаңа өршуі басталғанын ресми түрде жариялады. Індеттің ошағы Итури провинциясындағы Монгбвалу мен Рвампара аудандарында орналасқан. Алғашқы науқас Буния қаласында жұмыс істеген медбике болған. Ол бірнеше күн бұрын көз жұмған.
Мамандардың айтуынша, Эбола вирусы адамға жабайы жануарлар арқылы жұғады. Аурудың алғашқы белгілеріне дене қызуының көтерілуі, бұлшықет ауруы, бас ауруы, сондай-ақ бауыр мен бүйрек қызметінің бұзылуы жатады.