Дмитрий Медведев біртұтас Германияны мойындамайтынын мәлімдеді

Ресей Қауіпсіздік кеңесі төрағасының орынбасары Дмитрий Медведев қазіргі Германияның өмір сүруі үшін «жеткілікті құқықтық негіз жоқ» деп мәлімдеді. Оның айтуынша, 1990 жылғы Германияның бірігуі азаматтардың «еркін ерік білдіруінсіз» жүзеге асқан.

Медведевтің пікірінше, Германия қайта милитаризация жолына түсіп, Екінші дүниежүзілік соғыстағы жеңілісі үшін реванш алуға ұмтылып отыр. Ол Ресейдің RT мемлекеттік арнасына жарияланған мақаласында Германия үкіметін қатаң сынға алды.

Саясаткердің айтуынша, 1990 жылы Германияның қайта бірігуі референдумсыз өткен.

«Неміс мемлекеттілігінің құқықтық негізі өте әлсіз», — деді Медведев. Оның сөзінше, ФРГ мен ГДР-дің бірігуінен кейін болған барлық оқиғаны «заңдық тұрғыдан жарамсыз» деп санауға болады.

Алайда сарапшылардың пікірінше, Германияның бірігуі үшін халықаралық құқық немесе Германия конституциясы бойынша референдум өткізу міндетті болмаған. dpa агенттігінің мәліметінше, 1990 жылғы 3 қазандағы қайта бірігу Шығыс және Батыс Германия парламенттерінің шешімдері негізінде жүзеге асқан. ГДР Германияның Негізгі заңының 23-бабына сәйкес ФРГ құрамына қосылған.

Медведев сондай-ақ Берлинді халықаралық-құқықтық міндеттемелерін «ашық түрде саботаж жасады» деп айыптады. Ол 2024 жылдың қазанында Росток қаласында НАТО-ның жаңа әскери-теңіз штабының (CTF Baltic) ашылуын мысалға келтірді.

Оның пікірінше, бұрынғы ГДР аумағында мұндай штабтың орналасуы 1990 жылғы «Германияға қатысты түпкілікті реттеу туралы» келісімді бұзады. Бұл келісімге ФРГ, ГДР, КСРО, АҚШ, Ұлыбритания және Франция қатысқан.

«Мұндай жағдайда pacta sunt servanda (“шарттар орындалуы тиіс”) қағидатын бұзу келісімнің жарамсыз болуына алып келуі мүмкін. Ал бұл қазіргі Германия мемлекетінің құқықтық субъектілігіне күмән тудырады», — деді Медведев.

Ал Германия үкіметі Ростоктағы штаб ұлттық әскери нысан екенін және ол неміс қолбасшылығының бақылауында жұмыс істейтінін бірнеше рет мәлімдеген. Онда басқа елдердің әскери қызметкерлері де ротациялық негізде қызмет атқарады.

Германияның Ресейдегі елшісі Александер Ламбсдорфф та CTF Baltic штабы «екі плюс төрт» келісімін бұзбайтынын айтқан. Оның сөзінше, НАТО құрылымдарына Германия Қарулы күштерінің бөлімдерін енгізуге келісім аясында рұқсат берілген.

Сонымен қатар Медведев Германияны ядролық қаруға жақындамауға шақырды.

«Германияның ядролық қаруға жақындауының өзі — casus belli, яғни соғыс жариялауға себеп болатын жағдай», — деп жазды ол.

Қазіргі таңда Германияның өз ядролық қаруы жоқ. Алайда ел аумағында АҚШ-тың ядролық оқтұмсықтары орналасқан. Германия канцлері Фридрих Мерц пен оның үкіметі Германияның жеке ядролық қаруға ие болу мүмкіндігін бірнеше рет жоққа шығарған.