Дрон шабуылынан Мәскеу облысында үш адам қаза тауып, Ставрополь өлкесінде мұнай базасы өртенді

13 шілдеге қараған түні Ресейдің бірнеше өңіріне жаппай дрон шабуылы жасалды. Мәскеу облысының губернаторы Андрей Воробьевтің мәліметінше, шабуыл салдарынан үш адам қаза тауып, тағы бес адам жараланған.

Оның айтуынша, облыс аумағында 81 дрон атып түсірілген.

Истра қаласына қарасты Пионерский кентінде үш адам көз жұмып, тағы үшеуі жарақат алған. Сондай-ақ бес жеке тұрғын үйде өрт шыққан.

Солнечногорск қаласында дрон көпқабатты тұрғын үйге тиіп, екі адам зардап шекті. Ғимараттың қабырғасы мен терезелері зақымданған. Ал Бабкино ауылында екі жеке үй бүлінсе, Можайск қаласындағы көпқабатты үйдің карнизі мен терезелері зақымданған.

Сонымен қатар Ставрополь өлкесінің губернаторы Шпаков ауданындағы Вязники хуторындағы өндірістік аймақта өрт шыққанын хабарлады. Оқиға орнында өрт сөндірушілер мен төтенше жағдай қызметтері жұмыс істеп жатыр.

Украиналық Exilenova+ және Supernova+ Telegram арналарының мәліметінше, Михайловск қаласы маңындағы мұнай базасы өртенген. Astra басылымы өрт теміржол маңындағы мұнай базасында шыққанын және бұл соңғы бір аптада осы елді мекендегі екінші шабуыл екенін жазды.

Краснодар өлкесінің жедел штабы Темрюк ауданындағы кәсіпорындардың бірінде өрт шыққанын хабарлады. Ильич кентінде дронның сынықтары жеке тұрғын үй ауласына құлаған. Ал Белореченск ауданында ұшқышсыз аппараттың бөлшектері кәсіпорын аумағындағы техника сақталған ангарды зақымдаған.

Сондай-ақ украиналық Telegram арналары NASA FIRMS спутниктік жүйесінің деректеріне сүйеніп, Азов теңізі акваториясында бірнеше өрт ошағы тіркелгенін хабарлады. Олардың болжамынша, бұл Ресейдің «көлеңкелі флотының» танкерлеріне жасалған жаңа шабуылдардың салдары болуы мүмкін.