Ержан Бабақұмаровтың өлімі: іс бойынша алдын ала сот тыңдауы Астанада өтеді
Астанада Ержан Бабақұмаровтың өліміне қатысты қылмыстық іс бойынша алдын ала сот тыңдауы басталады.
Бұл туралы Tengrinews.kz хабарлады.
Алдын ала тыңдау 26 қаңтар, дүйсенбі күні, Астананың қылмыстық істер жөніндегі мамандандырылған ауданаралық сотында сағат 15:00-де өтеді. Тиісті ақпарат «Сот кабинеті» жүйесінде жарияланған. Айта кетейік, бұған дейін істі қарау түрлі себептермен бірнеше рет кейінге шегерілген.
Іс Қылмыстық кодекстің 99-бабының 1-бөлігі («Адам өлтіру») бойынша тергелген. Істі судья Айжан Күлбаева қарайды. Ол бұған дейін экс-министр Қуандық Бишімбаевке қатысты үкім шығарған.
Еске салайық, 2025 жылғы 30 қазанға қараған түні Ержан Бабақұмаров танысымен болған төбелес кезінде қаза тапқан.
Ержан Бабақұмаров кім болған?
Ержан Бабақұмаров 1969 жылғы 2 наурызда Талдықорған облысында дүниеге келген. Саяси ғылымдар кандидаты.
1996 жылдан бастап мемлекеттік қызметте еңбек етті. Президент Әкімшілігінде ішкі саясат бөлімі меңгерушісінің орынбасары, ақпараттық-талдау орталығының басшысы қызметтерін атқарды. Мәдениет және ақпарат министрлігінде жауапты хатшы, вице-министр болды. Сонымен қатар Премьер-министр кеңсесі басшысының орынбасары, Президент жанындағы Орталық коммуникациялар қызметінің директоры, Мемлекет басшысының кеңесшісі – Президент Әкімшілігінің талдау және болжау орталығының меңгерушісі қызметтерін атқарған.
2019 жылғы шілдеден 2022 жылғы ақпанға дейін Алматы қаласы әкімінің орынбасары болды.