Еуроодақ Украинаға 3,47 млрд еуро көлемінде кезекті транш бөлді
Еуроодақ Украинаға Ukraine Support Loan несиелік бағдарламасы аясында 3,47 млрд еуро көлемінде кезекті қаржылай транш аударды.
Бұл туралы Еуропалық комиссия мен Украина премьер-министрі Сергей Корецкий мәлімдеді.
Бұл қаражат Еуроодақтың жалпы көлемі 90 млрд еуро болатын қорғаныс несиелері пакетінің бір бөлігі саналады. Оның ішінде 60 млрд еуро Украинаның қорғаныс қабілетін күшейтуге, ал 30 млрд еуро мемлекеттік басқару жүйесінің жұмысын қамтамасыз етуге бағытталған.
Сергей Корецкийдің айтуынша, 2026 жылы осы тетік арқылы Украинаға 45 млрд еуро бөлу жоспарланған. Қазіргі уақытқа дейін оның 11,6 млрд еуросы тартылған. Оның ішінде 3,2 млрд еуро бюджет қажеттіліктеріне, ал 8,4 млрд еуро қорғаныс саласына жұмсалған.
Қаражат әуе кеңістігін қорғауға бағытталады
Еурокомиссия төрағасы Урсула фон дер Ляйен бөлінген қаржы Украинаның әуе кеңістігін қорғауға көмектесетінін айтты.
«Біз бұл қаражатты Украинаның әуе кеңістігін қорғауға көмектесу үшін бөліп отырмыз. Сонымен қатар Еуропаның өндірістік мүмкіндіктерін Украинаның инновациялық әлеуетімен ұштастыра отырып, қорғаныс өнеркәсібімізді жақындастырып жатырмыз. Бұл – біздің дрондар жөніндегі жаңа келісіміміздің нақты іске асып жатқанын көрсетеді», – деді ол.
Еурокомиссияның мәліметінше, бұл қаржы дрондарды сатып алу жоспарының алғашқы кезеңін қаржыландырады. Сонымен қатар алыс қашықтыққа ұшатын реактивті дрондарды, зымырандарды және Gripen жойғыш ұшақтарын сатып алуға да жұмсалады.
Бұдан бөлек, 2026 жылы Украинаның қорғаныс-өнеркәсіптік әлеуетін қолдауға 28,3 млрд еуро бөлу жоспарланған.
ЕО тағы 8,3 млрд еуро бөлуді мақұлдады
Сонымен қатар Еуроодақ кеңесі Украинаға қолдау көрсету тетігіне өзгерістер енгізіп, 2026 жылы қосымша 8,3 млрд еуро бөлуді мақұлдады.
Бұл қаражат та Ukraine Support Loan бағдарламасы арқылы беріледі. Алайда қаржыны алу үшін Украина құқық үстемдігін нығайту және сыбайлас жемқорлықпен күрес саласындағы қосымша міндеттемелерді орындауы тиіс.