Францияда оқушылар наразылығы күшейді: 625 адам ұсталды
Францияда мектеп оқушыларының наразылығы бір апта ішінде ел көлеміне тарады.
30 қыркүйекте 356 лицейдің жұмысы тоқтап, 625 адам ұсталды. Қақтығыстар кезінде 80-нен астам полицей мен жандарм жарақат алған.
Наразылық Париж және Иль-де-Франс аймағындағы лицейлерден басталып, кейін Лион, Страсбург, Бордо, Ницца және басқа қалаларға тараған.
Оқушылар мұғалімдердің жетіспеушілігіне, сабақ кестесінің дұрыс құрылмауына, сыныптардағы бала санының көптігіне және кейбір лицей ғимараттарының нашар жағдайына наразы. Олар білім саласына бөлінетін қаржыны көбейтуді де талап етіп отыр.
Франция Ішкі істер министрлігінің мәліметінше, 30 қыркүйекте 625 адам ұсталған. Қақтығыстар салдарынан 83 полицей мен жандарм жарақат алды. Білім министрі Эдуар Жеффре наразылық басталғалы 119 оқушы мен білім саласының қызметкері жараланғанын мәлімдеді.
Кейбір қалаларда лицейлердің алдына баррикадалар қойылып, қоқыс жәшіктері өртелген. Полиция мен наразылық білдірушілер арасында қақтығыстар болған. Оқушылардың жаралануына байланысты полицияның әрекетін тексеретін IGPN бірнеше оқиға бойынша тергеу жүргізіп жатыр.
Президент Эммануэль Макрон жастардың алаңдаушылығын түсінетінін, алайда зорлық-зомбылыққа жол беруге болмайтынын мәлімдеді. Үкімет оқушылардың талаптарын жинау және олармен диалог орнату үшін арнайы платформа іске қосуды жоспарлап отыр.
Оқушылар наразылығы Франциядағы мемлекеттік қызметкерлердің ереуілдерімен де тұспа-тұс келді. Олар 2027 жылғы бюджетке байланысты жоспарланған үнемдеу шараларына қарсы шығып жатыр.