Хуситтер Сауд Арабиясының әскери және мұнай нысандарына соққы жасағанын мәлімдеді
Йемендегі хуситтер Сауд Арабиясының оңтүстігіндегі әскери және энергетикалық нысандарға ондаған баллистикалық зымыран мен дрон ұшырғанын мәлімдеді.
Олардың айтуынша, Абха әуежайы, король Халид атындағы әуе базасы, сондай-ақ Абха мен Джизандағы Saudi Aramco нысандары нысанаға алынған.
Сауд Арабиясы билігінің мәліметінше, шабуылдан 73 адам зардап шеккен. Сонымен қатар бірнеше энергетикалық нысанда өрт шығып, кейбір операциялар уақытша тоқтатылған.
Хуситтер бұл шабуылға Йеменге соңғы үш күнде жасалған 121 әуе соққысы себеп болғанын айтады. Олар сондай-ақ Әл-Хазм қаласындағы түрмеге жасалған әуе шабуылынан кемінде жеті адам, оның ішінде бір бала қаза тапты деп мәлімдеді. Бұл ақпаратты Эр-Рияд әзірге растаған жоқ.
Хуситтер Сауд Арабиясы Йеменге шабуылын жалғастырса, корольдік аумағындағы соққыларды күшейтетінін ескертті.