Ирандағы соғыс: АҚШ алғаш рет оқ-дәрі тапшылығын мойындады
АҚШ пен Израильдің Иранға қарсы соғысы басталғанына алты айдан астам уақыт өткенде Вашингтон алғаш рет америкалық армияда оқ-дәрі тапшылығы туындағанын ресми түрде мойындады.
16 қыркүйекте AFP агенттігінің хабарлауынша, Пентагонның АҚШ Конгресіне ұсынған міндетті есебінде Ирандағы соғыс салдарынан Қарулы күштердің оқ-дәрі қоры азайғаны айтылған.
Конгрестің тәуелсіз бюджеттік бюросының есебінше, Ирандағы соғыс осы уақытқа дейін АҚШ-қа 38 млрд долларға түскен. Пентагонның бас инспекторының есебінде оның 22,3 млрд доллары оқ-дәріге жұмсалғаны көрсетілген.
«Соғыс стратегиялық қорларда олқылықтар туғызып, өнеркәсіптік өндіріс пен оқ-дәрі қорын толықтыру мүмкіндіктерінің жеткіліксіздігіне әкелді», – делінген AFP келтірген есепте.
Оқ-дәрі тапшылығын азайту үшін Пентагон қару-жарақ сатып алу мен өндіріс үдерістерін жеделдетуге, сондай-ақ қажетті материалдар, бөлшектер және жекелеген оқ-дәрі түрлерін алдын ала жинақтауға кіріскен. Алайда АҚШ Қорғаныс министрлігі өндірістік қуатты кеңейтуге едәуір уақыт қажет екенін атап өткен.
АҚШ президенті Дональд Трамп бұған дейін Ирандағы соғыс салдарынан америкалық армияның қару-жарақ қоры азайып барады деген сын-пікірлерді бірнеше рет жоққа шығарған.
Украина мен Тайваньға әсері қандай болуы мүмкін?
AFP бағалауынша, АҚШ армиясындағы қару-жарақ тапшылығы америкалық әскери жеткізілімдерге тәуелді Украина мен Тайвань үшін алаңдаушылық тудыруы мүмкін.
Атап айтқанда, Украинаға америкалық Patriot әуе қорғаныс жүйесіне арналған зымырандар шұғыл қажет. Ал Тайвань үшін АҚШ-пен жасалған қару-жарақ сатып алу келісімдері Қытайды тежеу тұрғысынан маңызды саналады. Бейжің Тайваньды Қытайдың бір бөлігі деп есептейді.
АҚШ-тың Ирандағы соғыстағы шығыны
Пентагон есебіне сәйкес, Ирандағы соғыс кезінде АҚШ-тың жеті әскери қызметкері ұрыс қимылдары барысында қаза тапқан. Тағы жеті әскери басқа жағдайларда көз жұмған. Ұрыс операциялары кезінде 417 америкалық әскери жараланған.
Сонымен бірге АҚШ Қарулы күштері төрт F-15 жойғыш ұшағынан айырылған, бір F-35 ұшағы зақымданған. Бұдан бөлек, жеті KC-135 жанармай құюшы ұшағына зақым келген және 30-ға жуық MQ-9 Reaper дроны жойылған.
Пентагон құжатына сәйкес, Таяу Шығыста орналасқан АҚШ әскери базаларындағы «жүздеген ғимарат пен нысан» да зақымданған.